Prostitucion në një apartament, arrestohen katër shtetase kineze

Policia ka finalizuar operacionin e koduar “Storm 17”, pas një hetimi që zgjati katër javë.

Gjatë aksionit u arrestuan në flagrancë katër shtetase kineze, të moshave nga 36 deri në 53 vjeç, të cilat akuzohen për ushtrim prostitucioni dhe përshtatje të ambienteve për këtë veprimtari.

Po ashtu, u proceduan në gjendje të lirë edhe katër persona nga Durrësi, Kavaja, Shijaku dhe Kosova, për veprën penale “Prostitucioni”.

Si prova materiale, policia sekuestroi katër pasaporta dhe një shumë parash.

Hetimet treguan se aktiviteti zhvillohej në dy ambiente të marra me qira në zonën e Shkëmbit të Kavajës dhe Golemit, të përshtatura për prostitucion.

Materialet e çështjes i janë dërguar Prokurorisë pranë Gjykatës së Shkallës së Parë të Juridiksionit të Përgjithshëm Durrës.