Ndarja e përgjegjësive për punët e shtëpisë mund të ndikojë edhe në kënaqësinë në çift...
AKTUALITET
100 mijë euro për “zgjidhjen” e pronave/ Kush është “Zana” që premtonte ndërhyrje në Kadastër
PiranjatPërditësimi i fundit 4 Shtator 2026, 18:04
Detaje nga skema e mashtrimit me pronat që kanë kapur vlerën e mbi 100 mijë eurove është zbuluar këtë të premte, 4 shtator, në kryeqytet nga policia e Tiranës, gjatë operacionit të koduar “Premtimi”.
Në pranga të strukturave të rendit ka përfunduar një Suzana Doda, ndërsa po ndiqet në gjendje të lirë bashkëpunëtorja e saj, Sara Ndoj. Skema e përdorur nga dy gratë mbështetej te premtimi i rremë për të ndërhyrë pranë Agjencisë Shtetërore të Kadastrës, me qëllim zgjidhjen e problemeve që qytetarët kishin me pronat.
“Dyshohet se kanë përvetësuar mbi 100 000 euro, duke mashtruar qytetarë, se do të ndërhynin në AShK, për t’iu zgjidhur rastet pronësore, dhe duke i pajisur me dokumente false, vihet në pranga 58-vjeçarja dhe në hetim bashkëpunëtorja e saj”, njofton policia. Nga kjo veprimtari e jashtëligjshme, ato arritën t’u merrnin personave të ndryshëm shuma të mëdha monetare.
Gjatë veprimeve kontrolluese, policia sekuestroi një sasi eurosh të dyshuara si të përfituara nga mashtrimi, certifikata që dyshohet se janë të falsifikuara, si dhe dy aparate celulare. Prokuroria ka marrë në dorëzim hetimet e mëtejshme për të zbardhur të plotë këtë aktivitet kriminal dhe për të identifikuar raste të tjera të mundshme.
Njoftimi i policisë:
Tiranë/Finalizohet operacioni i koduar “Premtimi”.
Dyshohet se kanë përvetësuar mbi 100 000 euro, duke mashtruar qytetarë, se do të ndërhynin në AShK, për t’iu zgjidhur rastet pronësore, dhe duke i pajisur me dokumente false, vihet në pranga 58-vjeçarja dhe në hetim bashkëpunëtorja e saj.
Sekuestrohen një shumë eurosh e dyshuar e përfituar nga kjo veprimtari kriminale, disa certifikata të dyshuara të falsifikuara dhe 2 celularë. Si rezultat i administrimit të shpejtë të informacionit të gazetarëve të emisionit investigativ “STOP”, se ishin kontaktuar nga shtetas të ndryshëm të pajisur me dokumente false nga një shtetase, e cila i kishte mashtruar se mund t’iu zgjidhte çështjet pronësore, pasi kishte të njohur në Agjencinë Shtetërore të Kadastrës, specialistët e Seksionit për Hetimin e Krimeve Ekonomiko-Financiare, në kuadër të operacionit të koduar “Premtimi”, ndaluan dhe vunë në pranga të dyshuarën, shtetasen S. D., 58 vjeçe.
Gjithashtu, referuan materialet në Prokurori, ku nisi procedimi në gjendje të lirë për bashkëpunëtoren e dyshuar të 58-vjeçares, shtetasen S. N., 27 vjeçe. Këto shtetase dyshohet se nëpërmjet veprimtarive kriminale të mashtrimit dhe falsifikimit të dokumenteve, kanë përfituar mbi 100 000 euro, nga qytetarë të ndryshëm. Në drejtimin e Prokurorisë, vijon hetimi për të zbardhur dhe dokumentuar raste të tjera të kësaj veprimtarie kriminale, të kryera nga shtetasja S. D. dhe bashkëpunëtorja e saj.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprat penale “Mashtrimi”, “Falsifikimi i dokumenteve” dhe “Përvetësimi i titullit apo detyrës shtetërore”.
