Henna Virkkunen, nënkryetarja ekzekutive e Komisionit Evropian për sovranitetin e teknologjisë, sigurinë dhe demokracinë, paralajm&eu...
AKTUALITET
8 mln euro për kompaninë e ‘grupit Aruba’, Bashkia e Tiranës i jep 2 tendera ‘Erald G’
PiranjatPërditësimi i fundit 1 Shtator 2026, 16:28
Bashkia e Tiranës ka shpallur fitues të 2 tenderave me vlerë 8 mln euro kompaninë ‘Erald-G’, e grupit Aruba. Bashkia nuk është ndalur edhe përballë faktit që SPAK akuzon pronarin e kësaj kompanie, Gëzim Ismaili, se ka fshehur paratë e pista të Luciano Koçekut, i njohur si koka e klanit të narkotrafikut të grupit Aruba. Kompania e Ismailit është shpallur fituese për procesin e rindërtimit në Kombinat.
Prokuroria e Posaçme SPAK është e bindur se Gëzim Ismaili, pronar i kompanisë “Erald-G” sh.p.k., ka kryer veprime të shumta për të fshehur paratë e siguruara në mënyrë kriminale nga Luçiano Koçeku, njeriu i konsideruar si kreu i klanit të narko-trafikut, të njohur me emrin “Grupi Aruba”. Prokurorët kërkuan në qershor të këtij viti që Ismaili të mbahej në arrest shtëpie, pasi rrezikonte të vijonte me aktivitetin e dyshuar kriminal të pastrimit të parave. Megjithatë, Bashkia e Tiranës i ka injoruar tërësisht këto detaje mbi personalitetin e tij, duke e shpallur kompaninë e tij në fillim të kësaj jave fituese të dy tenderave, me një fond limit në vlerë totale mbi 8 milionë euro.
Në Agjencinë e Prokurimit Publik janë publikuar së fundmi rezultatet e procedurave për ngritjen e dy pallateve të reja në zonën e Kombinatit, në kuadër të procesit të Rindërtimit.
Procedura e parë parashikon ndërtimin e godinës numër 10, me fond limit 288 milionë lekë të reja ose rreth 3 milionë euro. Ndërsa në tenderin e dytë është parashikuar ndërtimi i godinës me numër 11 dhe fondi limit është 471 milionë lekë të reja ose pak më shumë se 5 milionë euro. Dokumentet zyrtare tregojnë se kompania “Erald-G” e Gëzim Ismailit është përfshirë në garë në formën e bashkimit të operatorëve me një subjekt tjetër tregtar. Gjithashtu, të dhënat publike dëshmojnë se fituesit nuk kanë paraqitur ofertën më të ulët tregtare.
Në 10 qershor 2026, Prokuroria e Posaçme njoftoi se ishin lëshuar rreth 20 urdhër-arreste për një grup personash, të dyshuar se kishin krijuar një grup kriminal shqiptar për trafikun e lëndëve të forta narkotike nga vendet e Amerikës Latine drejt Europës. Këta persona, mes të cilëve Luçiano Koçeku dhe Artur Shehu, dyshohet se kanë pastruar qindra milionë euro të aktivitetit kriminal në industrinë e ndërtimit në Shqipëri. Grupi mori emrin “Aruba”, pas takimeve që krerët e organizatës së dyshuar kriminale zhvillonin në ishullin e Karaibeve. Në dosjen e mbërritur në Shqipëri nga autoritetet e Belgjikës thuhet se në ato takime merrnin pjesë edhe zyrtarë të lartë të qeverisë shqiptare. Prokuroria e Posaçme nuk ka dhënë asnjë detaj mbi identitetin e zyrtarëve dhe nuk rezulton të jetë lëshuar asnjë masë sigurimi për këtë kategori personash./syri
