Një javë më parë, kreu i Sindikatës së Pavarur të Punonjësve të Policisë së Shtetit, Sadetin Fishta, deno...
AKTUALITET
86 ditë revoltë/ Nis marshimi drejt Kryeministrisë, protestuesit të vendosur për largimin e Ramës
PiranjatPërditësimi i fundit 24 August 2026, 19:46
Mbahet sot protesta e 86-të qytetare në Tiranë, ku pjesëmarrësit kërkojnë dorëheqjen e kryeministrit Edi Rama dhe ndryshimin e drejtimit politik të vendit.
Qytetarët janë mbledhur në sheshin “Skënderbej”, nga ku më pas kanë nisur të marshojnë përgjatë bulevardit “Dëshmorët e Kombit” drejt Kryeministrisë.
Pas mbërritjes përpara godinës së qeverisë, protesta pritet të vijojë me fjalime të qytetarëve, të cilët do të paraqesin shqetësimet dhe pakënaqësitë e tyre ndaj politikave të ekzekutivit.
Krahas kërkesës për largimin e Ramës, protestuesit kundërshtojnë edhe disa nisma ligjore, të cilat, sipas tyre, cenojnë interesat e qytetarëve. Organizatorët kanë deklaruar se tubimet do të vijojnë edhe në ditët në vazhdim, deri në plotësimin e kërkesave të paraqitura.
Një prej qytetarëve të pranishëm në sheshin “Skënderbej” ngriti si shqetësim kryesor situatën në sistemin shëndetësor, duke u ndalur veçanërisht te kushtet në spitalin e Peshkopisë.
“Gjëja kryesore që më sjell në shesh është shëndetësia. Spitalet e Peshkopisë janë skandal, ke frikë të prezantohesh në spital. Shëndetësia duhet të jetë falas, siç ka thënë Rama, i cili nuk është më kryeministri im, sepse mua nuk më përfaqëson”, u shpreh ai.
Protestuesi kërkoi gjithashtu ndryshim politik dhe largimin e kryeministrit nga detyra.
“Thirrjet janë të shumta. Ne duam revolucion, që të ikë koka e parë dhe të na përfaqësojnë koka të reja. Rama meriton burgun”, deklaroi ai.
Protesta pritet të vijojë përpara Kryeministrisë, ndërsa organizatorët kanë paralajmëruar vijimin e aksionit qytetar edhe në ditët e ardhshme.
