A do të ketë rritje të çmimit të biletave të transportit? Ministri Karakaçi: Po shqyrtojmë rikthimin e skemës së subvencionimit të naftës

Ministri i Infrastrukturës dhe Energjisë, Enea Karakaçi u pyet nga gazetarët pas mbledhjes së qeverisë nëse kanë marrë kërkesë nga shoqatat për rritjen e çmimit të transportit për shkak të shtrenjtimit të naftës. 

Ai theksoi se po mbajnë takime me shoqatat e transportit, ndërsa shtoi se po shqyrtojnë mundësinë e rikthimit të skemës të subvencionimit të naftës, sikurse në vitin 2022, si dhe propozime të tjera të bëra nga shoqatat.

“Jo më larg se para rreth dy orësh bashkë me ministren e Ekonomisë dhe bashkinë e Tiranës ishin në takim me shoqatat e transportit. Situata e krizës dhe çmimeve është duke u ndjekur me kujdes. Qeveria ka njoftuar disa plane masash, si ngritja e Bordit të Transparencës dhe akcizën.

E dimë që gjatë 2022 janë marrë disa akte subvencioni sa i përket shoqatave, ky element po diskutohet përsëri. Por jemi duke e marrë në konsideratë bashkë me propozime të tjera të bëra nga shoqatat e transportit.”, tha ai.