Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
AKTUALITET
A është Mirzeta Kashnica, vartësja që Balluku ka kërcënuar dhe intimiduar gjatë kryerjes së hetimeve nga SPAK
Nga Elton QynoPërditësimi i fundit 18 December 2025, 09:34
Prishja e prova, intimidimi i dëshmitarëve dhe vazhdimi i përsëritjes së veprës penale gjatë qëndrimit në detyrën e ministres, janë 3 shkaqet kryesore që prokuroria e Posaçme kërkon arrestimin e Ministres së Infrastrukturës dhe Energjetikës, Belinda Balluku.
Një nga dëshmitarët dhe të pandehurat që ka kërcënuar Balluku gjatë fazës së hetimit dhe gjatë qëndrimit të saj si ministre është pikërisht, Mirzeta Kashnica.
Nga përgjimet e kryera telefonike ka rezultuar se Kashnica ka shfaqur shqetësim për kërcënime direkt nga ministria Belinda Balluku, dhe tashmë këto prova i janë dorëzuar me një USB, Kryetarit të Kuvendit të Shqipërisë, Niko Peleshi, me qëllim njohjen me to.
Mirzeta Kashnica, është Specialistë e Nivelit të Lartë në Ministrinë e Infrastrukturës dhe Energjisë dhe ka marë pjesë në disa tendera të zhvilluara nga ministria, përfshirë këtu dhe tenderin për paracaktimin e fituesit për ndërtimin e tunelit të Llogarasë.
Kashnica, ka qënë anëtarë e Komisionit të Vlerësimit të Ofertave dhe gjatë marjes në pyetje në prokurorinë e posaçme SPAK, ka bashkëpunuar me grupin e hetimit.
Në dijeni të bashkëpunimit të saj dhe përmbajtjes së deklarimit, ka hyrë dhe ministria Balluku, e cila sipas prokurorisë së posaçme SPAK, ka ushtruar presion dhe intimiduar këtë dëshmitare të pandehur, duke sjellë rrezikun potencial për të prishur provat në çështjen penale Nr.136.
Në relacionin që SPAK, i ka dërguar parlamentit me qëllim dhënien e autorizimit për arrestimin e Ballukut thuhet si më poshtë vijon:
“…gjithashtu, në vijim të hetimit, nga përdorimi i metodave speciale, kanë rezultuar të dhëna se nga ana e të pandehurës Belinda Balluku, giatë kohës që ajo është njohur me akuzën nga organi procedues dhe ushtronte detyrën si zëvendëskryeministres i Republikës së Shajpërisë dhe Ministër i Infrastrukturës dhe Energjisë, ka ushtruar presion më forma të ndryshme, ndaj personit të pyetur në këtë procedim, konkretisht shtetases M.K…”. (vartëse e saj).
Lëvizja e radhës e SPAK ka ngjallur jo pak reagime, ndër të parët që reagoi ishte kryeministri Edi Rama, por të shumtë ishin ata që reaguan edhe nga radhët e opozitës.
Balluku është marrë e pandehur për shkelje të barazisë në tendera në aferën e tunelit të Llogarasë dhe është nën hetim për shtatë lotet e Unazës së Madhe të Tiranës, ku sipas SPAK fituesit dyshohet se ishin të paracaktuar, shkruan Syri.net.
Sipas SPAK, e pandehura Belinda Balluku, në bashkëpunim me anëtarët e Komisionit të Vlerësimit të Ofertave, të pandehurit Evis Berberi, Gentian Gjyli, Erald Elezi, Jetmira Dervishi dhe Mirzeta Kashnica, kanë paracaktuar fituesin e kësaj procedure prokurimi, kanë krijuar avantazhe dhe privilegje të padrejta për bashkimin e operatorëve ekonomikë fitues “Intecar dhe Asl”.
Në kohën e kryerjes së veprimeve për këtë procedurë prokurimi, të pandehurit kanë pasur detyrat funksionale Evis Berberi, Drejtor i Përgjithëm i Autoritetit Rrugor Shqiptar, Erald Elezi, Drejtor i Drejtorisë së Planifikimit Strategjik dhe Operacioneve në Autoritetin Rrugor Shqiptar, Gentian Gjyli, Drejtor i Drejtorisë së Ndërtimit dhe i Mirëmbajtjes në Autoritetin Rrugor Shqiptar, Jetmira Dervishi dhe Mirzeta Kashnica, Specialistë të Nivelit të Lartë në Ministrinë e Infrastrukturës dhe Energjisë.
