AGSH denoncon incidentin në Durrës: Policët i marrin telefonin gazetares dhe i fshijnë pamjet

Asociacioni i Gazetarëve të Shqipërisë (AGSH) ka reaguar pas një incidenti të raportuar sot në Durrës, ku gazetarja, Albana Aliaj, pretendon se është penguar gjatë ushtrimit të detyrës.

Sipas dëshmisë së gazetares, ajo ndodhej në një vendngjarje ku Policia e Shtetit po zhvillonte një operacion, kur është rrethuar nga disa efektivë policie të maskuar dhe të paidentifikuar. Sipas saj, efektivët i kanë marrë nën presion telefonin celular dhe i kanë fshirë materialet filmike që kishte regjistruar.

AGSH e cilëson ngjarjen si “të papranueshme dhe alarmante”, duke theksuar se, sipas dëshmisë së gazetares, efektivët ishin në dijeni se ajo ishte në vendngjarje për të ushtruar detyrën e saj.

“Policia nuk mund të vendosë se çfarë duhet të filmojë një gazetar dhe as të fshijë materialet e tij gazetareske”, shprehet AGSH.

Organizata e gazetarëve kërkon nga Drejtoria Vendore e Policisë Durrës dhe Drejtori i Përgjithshëm i Policisë së Shtetit një sqarim të menjëhershëm dhe publik të incidentit, si dhe identifikimin e efektivëve të përfshirë.

AGSH kërkon gjithashtu marrjen e masave përkatëse nëse konfirmohen veprimet e denoncuara nga gazetarja.

Sipas Asociacionit, filmimi dhe dokumentimi nga gazetarët i veprimeve të Policisë në hapësira ku raportimi është i ligjshëm, për sa kohë nuk pengohet operacioni policor, është pjesë e rëndësishme e punës së medias dhe garantimit të transparencës për publikun.

“Policia e Shtetit duhet të garantojë sigurinë e gazetarëve, jo të pengojë, frikësojë apo ndërhyjë në punën e tyre”, përfundon reagimi i AGSH-së.