Një tjetër tentativë e negociatorëve për të bindur 35-vjeçarin të dorëzohet është zhvilluar pak minut...
AKTUALITET
Air Albania, rrëzimi i një eksperimenti politik / Borxhe, padi dhe izolim ajror
PiranjatPërditësimi i fundit 13 Dhjetor 2025, 13:41
Air Albania, linja ajrore e shpallur si krenaria kombëtare e Shqipërisë, ka humbur zyrtarisht licencën e operimit, duke i dhënë fund një projekti të promovuar për vite me radhë si histori suksesi, por që përfundoi në faliment financiar dhe kaos operacional, shkruan media gjermane Aero Telegraph.
Pas revokimit të licencës, kompania la pas një situatë të rënduar: pasagjerë të mbetur në tokë, fatura të papaguara, padi ndërkombëtare dhe punonjës që nuk kanë marrë pagat. Një projekt që dikur u promovua si simbol i krenarisë kombëtare, përfundoi i rrëzuar nën peshën e borxheve dhe menaxhimit të dështuar, duke u kthyer në një tjetër shembull të keqadministrimit në transportin ajror shqiptar.
Në dy dekadat e fundit, kjo është linja e gjashtë ajrore shqiptare që ndërpret aktivitetin, pas Ada Air, Belle Air, Albawings, Albatros Air dhe Albanian Airlines.
Rënia pas bumit të aviacionit shqiptar
Megjithatë, kompania hyri në krizë me bumin e aviacionit shqiptar të viteve të fundit, kur Wizz Air dhe Ryanair ndryshuan tregun me biletat e tyre me kosto të ulët. Në pranverën e vitit 2025, pas një periudhe reflektimi, Air Albania u rilançua me 11 destinacione të reja nga Tirana dhe avionë shtesë të marrë me qira nga Fly2Sky dhe SkyUp. Por edhe kjo përpjekje dështoi.
Më 20 shkurt 2025, kompania nisi fluturimin e saj të parë nga Tirana në Vjenë me një Airbus A320 të marrë me qira nga Fly2Sky, por në bord ishin vetëm 10 pasagjerë. Ndërkohë, Ryanair, Wizz Air dhe Austrian Airlines e kishin mbushur tregun me çmime konkurruese. Pas vetëm tre fluturimesh, edhe kjo linjë u braktis.
Kriza e fundit dhe fundi i pashmangshëm
Rihapja dhe lidhjet e reja të njoftuara nuk u realizuan kurrë. Kohët e fundit, vetëm një avion i marrë me qira përdorej për fluturime të rralla drejt Milanos dhe Stambollit, ndërsa raportimet për gjendjen e rënduar financiare shtoheshin çdo ditë.
Paditë, borxhet dhe largimi i Turkish Airlines
Air Albania është përballur me padi në gjykata ndërkombëtare për mospagim tarifash dhe kostosh operative. Në nëntor, Turkish Airlines njoftoi largimin nga partneriteti dhe ndërprerjen e bashkëpunimit në linjën e Stambollit – sinjali i qartë se falimentimi ishte çështje kohe. Sipas raportimeve, borxhet e Air Albania kapin shifrën e mbi 100 milionë eurove.
Historia e kompanisë përfundoi me uljen e fluturimit ZB1003 nga Stambolli, pak para mesnatës së 2 dhjetorit 2025 – duke mbyllur përfundimisht një kapitull që nisi me ambicie të mëdha dhe përfundoi në dështim të plotë financiar.
