Aksident fatal në aksin Peqin-Elbasan, humb jetën 73-vjeçari pasi u përplas nga një furgon

Një aksident me pasojë vdekjen e një 73-vjeçari është regjistruar paraditen e kësaj të premteje në aksin kombëtar Peqin-Elbasan.

Ngjarja ndodhi rreth orës 10:00, në fshatin Përparim, në territorin e Bashkisë Peqin. Sipas informacioneve paraprake, Agim Hoxha, 73 vjeç, u përplas nga një furgon teksa po lëvizte në këtë segment rrugor. Si pasojë e përplasjes së fortë, i moshuari pësoi dëmtime të rënda dhe ndërroi jetë në vendngjarje.

Menjëherë pas aksidentit, në vendngjarje mbërritën shërbimet e Policisë dhe grupi hetimor, të cilët kanë nisur veprimet për zbardhjen e plotë të rrethanave të ngjarjes dhe përcaktimin e shkakut të aksidentit.