Aksident i trefishtë në aksin Peqin-Elbasan, plagosen 5 persona

Një aksident i rëndë rrugor është regjistruar mbrëmjen e sotme në aksin Peqin-Elbasan, pranë fshatit Murras, ku janë përfshirë tre automjete, mes tyre edhe një furgon.

Sipas informacioneve paraprake, si pasojë e përplasjes kanë mbetur të plagosur 5 persona. Të dëmtuarit kanë marrë lëndime të ndryshme dhe janë transportuar me urgjencë drejt Spitalit Rajonal të Elbasanit, ku po marrin ndihmën e nevojshme mjekësore.

Aksidenti ka shkaktuar bllokimin e qarkullimit në këtë segment rrugor, duke krijuar radhë të gjata automjetesh në të dyja drejtimet.

Në vendngjarje kanë mbërritur forcat e Policisë dhe ekipet e emergjencës, të cilat po punojnë për menaxhimin e situatës, normalizimin e trafikut dhe zbardhjen e shkaqeve të aksidentit.

Pritet një njoftim zyrtar nga autoritetet për të dhëna më të plota mbi rrethanat e përplasjes dhe gjendjen shëndetësore të të plagosurve.