Aksident në aksin Gjirokastër–Tepelenë, makina me targa të Kosovës del nga rruga, plagoset çifti

Në aksin rrugor Gjirokastër–Tepelenë, pranë vendit të quajtur Subash, është regjistruar një aksident rrugor, ku një automjet tip “Seat” me targa të Kosovës ka dalë nga rruga, duke përfunduar në fushë.

Në automjet udhëtonte një çift, i cili ka mbetur i plagosur si pasojë e aksidentit. Të dy janë transportuar në Urgjencën e Spitalit Rajonal “Omer Nishani”, ku po marrin ndihmën e nevojshme mjekësore.

Sipas informacioneve paraprake, të plagosurit ndodhen jashtë rrezikut për jetën.

Në vendngjarje kanë mbërritur shërbimet e Policisë, të cilat kanë nisur hetimet për të zbardhur rrethanat dhe shkaqet e aksidentit.