Aksident tragjik/ “Audi” del nga rruga, humb jetën shoferi, plagosen tre të tjerë

Një aksident tragjik ka ndodhur në aksin nacional Korçë-Maliq, në afërsi të fshatit Vashtëmi, ku si pasojë një person ka humbur jetën dhe tre të tjerë kanë mbetur të plagosur. Bëhet me dije se një automjet tip “Audi”, dyshohet ka lëvizur me shpejtësi të lartë dhe ka goditur nga pas një automjet tjetër.

Si pasojë e përplasjes së fortë, automjeti i goditur ka dalë nga rruga. Nga mjeti i përplasur ka humbur jetën shoferi 27-vjeçar, i cili po udhëtonte i vetëm. Ndërsa nga automjeti tip “Audi”, ku udhëtonin katër persona, kanë mbetur të plagosur tre prej tyre, një djalë dhe dy vajza.

Njëri nga të plagosurit po merr ndihmë mjekësore në Spitalin e Korçës, ndërsa dy vajzat janë transportuar në Spitalin e Pogradecit. Ndërkohë, drejtuesi i mjetit “Audi” është shoqëruar nga policia dhe po kryhen të gjitha hetimet për të zbardhur shkaqet dhe rrethanat e aksidentit të rëndë.