16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
Akuza të forta nga protesta: Rama dhe Vuçiç, arkitektët e ndarjes së Kosovës
PiranjatPërditësimi i fundit 14 September 2026, 20:42
Qytetarët kanë vijuar për të 107-ën ditë radhazi protestën para Kryeministrisë, duke kërkuar largimin e kryeministrit Edi Rama dhe qeverisë së tij.
Gjatë tubimit kanë marrë fjalën edhe qytetarë të ndryshëm, të cilët kanë artikuluar kritika ndaj qeverisjes dhe institucioneve.
Një protestuese e cilësoi “shkombëtarizimin” si një nga rreziqet kryesore me të cilat, sipas saj, përballet sot vendi. Ajo pretendoi se ky proces është zhvilluar në dy faza, fillimisht përmes asaj që e konsideron shkatërrim të infrastrukturës dhe më pas përmes shitjes së trojeve.
“Të nderuar qytetarë, atdheu ynë është në rrezik. Kjo qeveri e korruptuar, kjo politikë 36-vjeçare ka realizuar këtë shkombëtarizim në dy faza. E para, shkatërrimi i infrastrukturës. E dyta, erdhi me shitjen e trojeve shqiptare”, deklaroi ajo.
Në fjalën e saj, protestuesja lëshoi akuza edhe ndaj Policisë së Shtetit, të cilën e cilësoi si të nënshtruar ndaj pushtetit. Ajo kritikoi veçanërisht mënyrën se si policia ka vepruar ndaj pjesëmarrësve në protesta.
“Nuk duan të kuptojnë sistemin, një polici që me kostum dhe pa kostum është e përgjumur. Një polici e përgjunjur para pushtetit, arreston protestuesit, disa prej tyre gra e fëmijë”, tha protestuesja.
Ajo përdori tone të forta edhe ndaj Parlamentit, duke kërkuar shpërndarjen e tij dhe largimin e qeverisë.
“Më mirë shpërndajmë parlamentin sesa kthejmë Shqipërinë në Palestinë. Jo kryeministër, më mirë shpërndajmë parlamentin”, u shpreh ajo.
Në vijim, protestuesja iu rikthye edhe zhvillimeve të vitit 2020 dhe debatit të atëhershëm për një ndryshim të mundshëm të kufijve mes Kosovës dhe Serbisë. Ajo pretendoi se kryeministri Edi Rama dhe presidenti serb Aleksandar Vuçiç kishin qenë pjesë e një skenari për ndarjen e Kosovës.
“Më 24 qershor të 2020 u ndërpre udhëtimi i një shqiptari i cili ishte nisur për në Washington për të nënshkruar ndarjen e Kosovës. Një prej arkitektëve të ndarjes së Kosovës ishte Rama dhe Vuçiç. E njëjta situatë është edhe sot me Shqipërinë”, deklaroi ajo.
