SKANDAL/ Syri i Kaltër në duart e një ''rrjeti familjar'', ja skema e paligjshme

Një denoncim, i shoqëruar me video, ka mbërritur në redaksinë e Piranjave, duke ngritur dyshime serioze për abuzim me detyrën, nepotizëm dhe shkelje të ligjit në administratën publike.

Sipas informacionit të ardhur nga denoncuesi, pretendohet se në qendër të akuzave është drejtori i AKZM-së në Vlorë, Martin Goriçi, i cili sipas denoncuesit mësohet se ka lejuar dhe favorizuar aktivitete të paligjshme në zonën e mbrojtur të Syrit të Kaltër. Denoncimi ngre shqetësimin se një subjekt privat, i lidhur familjarisht me persona të administratës, operon pa autorizimet përkatëse duke mbledhur të ardhura nga turistët.

Sipas dëshmisë, individë të paautorizuar vendosin tarifa për vizitorët në këtë zonë të mbrojtur natyrore, ndërkohë që këto të ardhura nuk kalojnë në kanalet zyrtare shtetërore. Më tej pretendohet se aktiviteti zhvillohet edhe gjatë orëve të mbrëmjes, madje duke shoqëruar turistë në ambiente private, çka ngre pikëpyetje të forta për sigurinë dhe ligjshmërinë e këtij operimi.

Denoncuesi thekson gjithashtu se personi i përfshirë është i punësuar në Bashkinë Gjirokastër dhe paralelisht ushtron aktivitet në zonën e mbrojtur, duke e kthyer këtë në një “biznes familjar” në kurriz të pasurisë publike./Piranjat News