Alarm mjedisor në Vjosë, Bashkia Këlcyrë depoziton mbetjet në ambient të hapur pranë lumit

Mbetjet urbane të mbledhura nga Bashkia Këlcyrë depozitohen në një ambient të hapur pranë lumit Vjosa, duke ngritur shqetësime për ndikimin që kjo praktikë mund të ketë në mjedis dhe në ekosistemin e zonës.

Venddepozitimi ndodhet në afërsi të shtratit të lumit, ku mbetjet grumbullohen në siperfaqe të hapur. Banorët shprehen të shqetësuar për ndotjen, aromat e pakëndshme dhe rrezikun që mbetjet të përhapen drejt lumit, veçanërisht gjatë reshjeve ose erërave të forta.Lumi Vjosa, i shpallur Park Kombëtar dhe i njohur për vlerat e tij unike natyrore, vijon të përballet me problematika që lidhen me menaxhimin e mbetjeve.

Depozitimi i mbetjeve urbane nga Bashkia Këlcyrë në një ambient të hapur pranë lumit ka rikthyer në vëmendje nevojën për një zgjidhje të qëndrueshme dhe në përputhje me standardet mjedisore.

Mbetet për t'u parë se çfarë masash do të ndërmarrë Bashkia Këlcyrë dhe institucionet përgjegjëse për trajtimin e kësaj situate dhe për mbrojtjen e një prej pasurive më të rëndësishme natyrore të vendit.