Alarm në Fier/ Banorët e “Afrim i Ri” përballen me ndërtim të paligjshëm dhe kërcënime, kërkojnë ndërhyrje urgjente

Banorët e zonës “Afrim i Ri” në Fier kanë ngritur shqetësime serioze lidhur me ndërtimin e një grumbulluesi të ujërave të zeza, për të cilin pretendojnë se po realizohet pa leje ndërtimi dhe në një zonë të banuar. Sipas denoncimit të bërë në redaksinë tonë Piranjat news nga një prej banorëve, situata është përshkallëzuar ditët e fundit. Ai shprehet se ky projekt nuk është konsultuar me asnjë dhe se projekti paraqet rrezik për shëndetin dhe sigurinë e tyre.

Banorët deklarojnë se kanë marrë informacione se autoritetet do të rikthehen sërish në zonë në ditët në vijim, të shoqëruar nga forcat e policisë, për të vijuar punimet.

Ata pretendojnë se po ushtrohet presion dhe kërcënim ndaj tyre për të mos kundërshtuar ndërtimin.

“Ky investim është i paligjshëm dhe po bëhet në mes të një zone të banuar. Kemi frikë për jetën dhe shëndetin tonë. Kërkojmë transparencë dhe ndërhyrje të menjëhershme nga institucionet përgjegjëse,” shprehen banorët.

Komuniteti i zonës “Afrim i Ri” i bën thirrje autoriteteve që të verifikojnë situatën në terren dhe të ndihmojnë në zgjidhjen e këtij konflikti, duke garantuar respektimin e ligjit dhe të drejtave të banorëve./piranjat news