Alarm në Gjirokastër! Zjarri pranë repartit ushtarak përfshin parkun e bletëve

Një zjarr ka rënë mesditën e kësaj të diele në vendin e quajtur "Poligoni", mbi repartin ushtarak në fshatin Gerhot, Gjirokastër.

Sipas Drejtorisë së Mbrojtjes nga Zjarri dhe Shpëtimit (MZSH) të Gjirokastrës, njoftimi për ngjarjen është marrë rreth orës 12:50. Flakët përfshinë një ambient të rrethuar me rrjetë teli, i përdorur si park bletësh, duke rrezikuar kosheret dhe objektet ndihmëse.

Në vendngjarje ndërhynë dy grupe zjarrfikësish, të cilët bënë të mundur izolimin e flakëve dhe shuarjen e plotë të zjarrit. Si pasojë e flakëve u dogj një kasolle ku ruheshin materialet e bletarisë, ndërsa të gjitha kosheret e bletëve u shpëtuan pa pësuar dëme.

Dyshimet paraprake janë se zjarri është shkaktuar nga pakujdesia gjatë përdorimit të tymit për kontrollin e bletëve. Ndërkohë, organet ligjzbatuese kanë nisur hetimet për zbardhjen e plotë të rrethanave të ngjarjes.