Përfundimi i Kupës së Botës shënoi edhe fundin e karrierës ndërkombëtare për disa nga emrat më të njohu...
AKTUALITET
Aleanca mes klaneve rome dhe mafies shqiptare të kanabisit/ Policia spanjolle nis një mega-operacion
PiranjatPërditësimi i fundit 21 Prill 2026, 11:50
Që në orët e para të mëngjesit të kësaj të marte, më 21 prill, Skuadra Speciale Mossos, me rreth 200 agjentë, po zhvillon një operacion në disa zona të Katalonjës kundër kultivimit dhe trafikut ndërkombëtar të kanabisit, me epiqendër në lagjen Mariola në Lleida të Spanjës. Kjo lagje e kryeqytetit të Segriàs, ku po kryhen kontrolle dhe bastisje të shumta, kontrollohet nga klane të etnisë rome, të cilat janë një nga objektivat e këtij operacioni të madh policor, që sipas El Caso po zhvillohet njëkohësisht edhe në Seròs dhe në zona të tjera.
Hetimi është fokusuar në goditjen e dy organizatave që, në mënyrë të koordinuar, ishin forcuar në kultivimin e kanabisit. Nën drejtimin e Divizionit të Hetimit Kriminal (DIC), është arritur të provohet lidhja mes klaneve të Mariolës dhe mafies shqiptare të kanabisit. Pritet të kryhen më shumë se dhjetë arrestime në bastisjet e nisura që në agim, kryesisht në Lleida, por edhe në zona të tjera të vendit. Deri tani nuk janë bërë publike vendndodhjet e sakta të operacionit.
Aleancë mes shqiptarëve dhe klaneve të Mariolës
Sipas informacioneve të para, hetimi synon të provojë edhe trafik armësh dhe janë duke u kontrolluar dy plantacione aktive të kanabisit. Një nga zbulimet kryesore të këtij hetimi është lidhja mes mafies shqiptare të kanabisit dhe klaneve rome, të cilat funksiononin si një lloj “franchise” – një model që deri më tani nuk ishte identifikuar në Spanjë.
Sipas policisë, trafikantët shqiptarë dyshohet se ofronin njohuritë dhe materialet për kultivim, ndërsa me klanet lokale binin dakord për çmimin e drogës së prodhuar. Tregu i kanabisit është rritur aq shumë në Spanjë sa ka detyruar prodhuesit kryesorë – të lidhur me rrjete shqiptare – të krijojnë aleanca me grupe kriminale vendase për të përmbushur kërkesën ndërkombëtare.
Agjentët e Mossos, të mbështetur nga njësitë speciale ARRO dhe Brimo, si dhe nga mjete ajrore dhe helikopteri policor, nisën operacionin në mëngjes herët për të siguruar banesat që do të kontrollohen.
Operacioni pritet të zgjasë disa orë dhe më pas të arrestuarit nga të dy grupet kriminale do të dërgohen në komisariatin e Lleida-s, ku do të rritet edhe niveli i sigurisë. Pritet që të enjten, në ditën e Shën Jordit, ata të dalin para gjykatës që ka ndjekur hetimin që nga fillimi.
Operacioni është zhvilluar me një prani të madhe policore për të garantuar sigurinë maksimale gjatë bastisjeve dhe arrestimeve, duke pasur parasysh veçoritë e kësaj zone të Lleida-s.
