Rodrigo Hernández, i njohur si Rodri, ka zbuluar arsyet që e shtynë të zgjedhë Barcelonën, pavarësisht interesimit të...
AKTUALITET
AMP arreston oficerin e Policisë në Durrës, procedohen dy të tjerë
PiranjatPërditësimi i fundit 15 Shtator 2026, 11:28
Agjencia e Mbikëqyrjes Policore (AMP) ka finalizuar më 15 shtator 2026 një operacion që çoi në arrestimin në flagrancë të një punonjësi të Policisë dhe procedimin në gjendje të lirë të dy efektivëve të tjerë, të dyshuar për korrupsion dhe shpërdorim detyre.
Operacioni u zhvillua në kuadër të procedimit penal nr. 100/2026, pas një hetimi me metoda speciale të kryer nga Drejtoria Rajonale Durrës-Kavajë, në bashkëpunim me Drejtorinë e Përgjithshme të AMP-së dhe nën drejtimin e Prokurorisë së Juridiksionit të Përgjithshëm Durrës.
Në përfundim të aksionit u arrestua në flagrancë efektivi S.M., me detyrë Trupë Shërbimi Patrullë e Përgjithshme.
Ndërkohë, për veprën penale “Shpërdorimi i detyrës” u referuan në gjendje të lirë edhe dy punonjës të tjerë të Policisë: S.H., Specialist për Rendin në Komisariatin e Policisë Durrës, dhe A.K., me detyrë Trupë Shërbimi Patrullë e Përgjithshme në të njëjtin komisariat.
Hetimi është zhvilluar për veprat penale “Korrupsioni pasiv i personave që ushtrojnë funksione publike” dhe “Shpërdorimi i detyrës”.
Pas përfundimit të veprimeve procedurale, materialet e përpiluara janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, e cila do të vijojë me veprimet e mëtejshme sipas ligjit.
AMP thekson se do të vazhdojë të ushtrojë kompetencat e saj ligjore për evidentimin, dokumentimin dhe goditjen e rasteve të paligjshmërisë, korrupsionit dhe shpërdorimit të detyrës në radhët e punonjësve të strukturave që mbikëqyr./ Piranjat News
