Teksa protesta para zyrës së tij hyri në ditën e saj të 35-të, Edi Rama zgjodhi t’i kushtojë vëmendje promovimit...
AKTUALITET
Arkivol, tortë betoni dhe qirinj, protesta e “ditëlindjes” trondit Ramën/ Pankartat ‘pikante’ në protestë
PiranjatPërditësimi i fundit 4 Korrik 2026, 23:37
Kryeministri Edi Rama festoi sot 62-vjetorin e lindjes në një ditë të pazakontë, ku protesta e 35-të radhazi u kthye në një demonstratë masive para Kryeministrisë, me pjesëmarrje qytetarësh nga Shqipëria dhe diaspora. Tubimi nisi nga sheshi “Skënderbej”, ku mijëra protestues marshuan drejt godinës së qeverisë duke thirrur “Rama jep dorëheqjen”, “Revolucion”, “Shqipëria e re” dhe “Diaspora është me ne”.
Në protestë u panë edhe flamuj amerikanë krahas atyre shqiptarë, ndërsa organizatorët e cilësuan pjesëmarrjen e emigrantëve si “mesazh solidariteti përtej kufijve”.
“Dhurata” simbolike për ditëlindje Atmosfera e protestës u shoqërua me një seri simbolikash të forta, të cilat protestuesit i paraqitën si “dhurata për 62-vjetorin” e kryeministrit.
Një prej tyre solli një kostum burgu, sapun, miell dhe brisk, duke i shoqëruar me deklarata ironike për “urime me burg”. Më pas, para Kryeministrisë u shfaq një tortë prej betoni dhe një tjetër e vërtetë me mbishkrimin “Rama TQR – Te Quiero Rama”, e shoqëruar me një qiri me numrin zero, që u fik pas thirrjeve “Rama jepe dorëheqjen”. Simbolikat vijuan me një arkivol të vendosur në shesh me mbishkrimin “Arkivoli politik i Ramës”, si dhe një statujë me syze të kuqe e etiketuar “Diktatori i fundit”, e cila u rrëzua dhe u shkelmua nga protestuesit, në një akt të krahasuar nga organizatorët me rrëzimin e simboleve të vitit 1991.
Fjalime, akuza dhe thirrje për gjykata
Në podium, disa prej organizatorëve dhe aktivistëve mbajtën fjalime të forta politike. Edvioll Kulluri akuzoi kryeministrin për shpifje dhe paralajmëroi padi, duke kërkuar gjithashtu lirimin e protestuesve të arrestuar.
“Rama në burg, Berisha në burg!”, u dëgjua në një prej fjalimeve, ndërsa pjesëmarrësit kërkuan bashkim dhe vijim të protestave deri në dorëheqje.
Një tjetër protestues paralajmëroi për mundësi tensioni, duke u distancuar publikisht nga çdo akt dhune dhe duke theksuar se protesta duhet të mbetet paqësore.
“Ne si atdhetarë kërkojmë rrëzimin e qeverisë dhe sistemit 35-vjecar në paqe. Kemi informacione se njerëz nga rrethe janë nis të vijnë të veprojnë ndryshe.
Ne si këshill organizativ nuk pajtohemi me asnjë shenjë dhune. Kushdo që të vijë dhe të provojë një mënyrë ndryshe, ne jemi të distancuar prej veprave te dhunës”
Kënga e “ditëlindjes” Një moment që mori vëmendje ishte performanca e një fëmije në podium, i cili këndoi një variant ironik të këngës së ditëlindjes, duke u kthyer në një nga episodet më të shpërndara në protestë.
“Shumë urime për ty,
asnjëri s’të do ty,
ti dukesh si kafshë,
shko mbrapa te Kopshti Zoologjik!”
Reagime familjare dhe çështja e të arrestuarve
Në protestë foli edhe bashkëshortja e një prej të arrestuarve, e cila kërkoi lirimin e protestuesve, duke pretenduar se ata po mbahen padrejtësisht dhe duke falënderuar publikisht qytetarët për mbështetjen.
“Kam dalë për burrin tim sepse e kanë burgosur pa të drejtë. Ai ka ardhur këtu me qëllimin e fëmijës së vet dhe ka protestuar qe ditën e parë.
Kërkoj lirim sa më të shpejtë. Ishalla nesër gjykata e liron. Unë nuk ia dal dot vetëm me dy fëmijët e vegjël. Njërin e kam të paralizuar. Isha në punë kur Altini vinte në protestë por tani e kam lënë punën për fëmijët.”, deklaroi ajo.
Diaspora në marshim drejt Tiranës
Një kolonë automjetesh me emigrantë shqiptarë nga disa shtete të Europës mbërriti në kryeqytet për t’iu bashkuar protestës. Ata ndaluan fillimisht pranë paraburgimit në “Mine Peza”, ku mbahen disa prej të arrestuarve, për të shprehur solidaritet. Ndërkohë, në disa pika kufitare, veçanërisht në Morinë, u raportuan radhë të gjata dhe kontrolle të shtuara, duke shkaktuar vonesa për qytetarët që hynin në Shqipëri.
Një ditëlindje mes protestash
Kryeministri Edi Rama, i lindur më 4 korrik 1964, e gjeti ditëlindjen e tij të 62-të nën një protestë të madhe që përkon me kërkesat për dorëheqjen e tij.
Protesta e sotme shënon të 35-n radhazi, ndërsa organizatorët paralajmërojnë se tubimet do të vijojnë deri në realizimin e kërkesave të tyre politike.
