Arrestimi për protestën/ Denoncimi i avokatit: I burgosuri që vuan nga epilepsia u dhunua në qeli

Një prej të burgosurve për protestën e së enjtes te Parlamentit, është edhe Niko Qarkaj.

Sipas denoncimit të avokatit, ai është dhunuar brenda qelisë së paraburgimit.

I riu vuan nga Epilepsia dhe sipas denoncimit, gjatë momenteve të krizës, del jashtë kontrollit.

Denoncimi:

Ditën e sotme vizitova të ndaluarin Niko Qarkaj, i cili u shoqërua gjatë protestës. Ai vuan nga epilepsia dhe, sipas tij, gjatë qëndrimit në komisariat ka pësuar disa kriza.

Mbrëmjen e djeshme, gjatë një prej krizave epileptike, për shkak të gjendjes së tij ai nuk ka qenë i vetëdijshëm për veprimet apo fjalët e tij. Sipas deklarimit të tij, gjatë këtij episodi mund të ketë ofenduar punonjësit e policisë, por në vend që të merrte ndihmën e nevojshme, ai pretendon se është dhunuar fizikisht nga efektivët e policisë, duke mbetur edhe i gjakosur. Ai ndodhet në grevë urie që nga momenti i shoqërimit.

Thirrja jonë është që Niko Qarkaj të lirohet menjëherë dhe të nisë një hetim i plotë e i pavarur për veprimet e dhunshme që ai pretendon se janë ushtruar ndaj tij nga efektivët e policisë. /PiranjatNews/