Arrestohet një 42-vjeçar në Rinas, tentoi të trafikonte armë zjarri drejt Mbretërisë së Bashkuar

Një 42-vjeçar ka rënë në prangat e policisë në aeroportin e Rinasit. Sipas informacioneve paraprake, ai dyshohet të ketë tentuar të trafikojë një armë zjarri nga vendi ynë në drejtim të Mbretërisë së Bashkuar.

Strukturat e sigurisë së aeroportit në bashkëpunim me shërbimet e Policisë Kufitare bënë të mundur arrestimin e 42-vjeçarit me iniciale S.K, gjatë kontrollit të bagazheve të pasagjerëve. 

Sipas Policisë, gjatë kontrollit me skaner të bagazhit u zbulua një pistoletë së bashku me municion luftarak. Arma u sekuestrua si provë materiale, ndërsa dyshohet se do të trafikohej jashtë. Materialet janë referuar në Prokurorinë e Tiranës, ku 42-vjeçari do të hetohet për veprën penale “Trafikimi i armëve dhe i municionit”.