Ministria e Drejtësisë ka reaguar lidhur me transferimin e Erion Veliajt nga ambientet e paraburgimit, duke sqaruar se lëvizja drejt Institucioni...
AKTUALITET
Arrestoi Altin Morinën dhe u largua nga policia pas problemeve me Prodën, rikthehet në detyrë Ritvan Pali!
PiranjatPërditësimi i fundit 30 August 2026, 14:48
Ritvan Pali është kthyer sërish në radhët e Policisë së Shtetit, rreth nëntë muaj pasi u shkëput nga uniforma blu pas një periudhe të vështirë në karrierën e tij.
Ai është emëruar tashmë në pozicionin e rëndësishëm të shefit të Operacionales në Policinë e Lezhës.
Karriera e Palit ndryshoi thellësisht më 4 prill 2025. Në atë kohë, si shef i Komisariatit nr. 2 në Tiranë, ai mori pjesë në operacionin për arrestimin e Altin Morinës, ish-efektiv i RENEA-s dhe person i shpallur në kërkim nga SPAK për akuzat e trafikimit të drogave dhe pjesëmarrjes në një grup të strukturuar kriminal.
Pas këtij arrestimi, pozicioni i tij pësoi një sërë ndryshimesh. U largua nga drejtimi i Komisariatit nr. 2 dhe u transferua në disa detyra të tjera.
Në qendër të tensionit institucional qëndronte Ilir Proda, i cili në atë periudhë drejtonte Policinë e Shtetit. Gjatë mandati të tij, Pali u transferua disa herë dhe iu ul edhe grada – masa që ai i kundërshtoi në rrugë gjyqësore.
Një nga përplasjet më të forta lidhej me vendimin disiplinor për uljen me një gradë për një vit. Pali e çoi çështjen në Gjykatën Administrative, e cila vendosi në favor të tij dhe shfuqizoi masën.
Pas kësaj faze, ai u largua nga Policia e Shtetit. Tani, pas gati nëntë muajsh, është rikthyer në uniformë.
Ndryshimet në drejtimin e lartë të Policisë dhe ardhja e Skënder Hitës në krye të institucionit kanë hapur rrugën për kthimin e tij. Oficeri, i cili përveç formimit policor mban edhe diplomë në Juridik, merr tani përgjegjësinë e drejtimit të Operacionales në Policinë e Lezhës.
