Avokati Ndrecaj: Mungesa e Veliajt në gjyq, pengesë për zhvillimin e seancës! SPAK: Burgjet s’kanë marrë masa për njoftimin e tij

Avokati i Erion Veliajt, Plarent Ndreca ka deklaruar në gjyqin që po mbahet në Gjykatën e Posaçme kundër Krimit të Organizuar dhe Korrupsionit (GJKKO) se mungesa e kryebashkiakut të Tiranës është një pengesë për zhvillimin e gjykimit, pasi ai nuk ka shprehur vullnet nëse do të jetë apo jo i pranishëm.

“Vlerësoj se mungesa e Veliajt është pengesë për zhvillimin e gjykimit, pasi ai nuk ka shprehur vullnet për seancën”, tha avokati.

Po ashtu, Ndreca ka ngritur pretendime edhe për fashikujt e dosjes hetimore, duke theksuar se urdhri ka qenë që tu vihen në dispozicion të gjitha.

Ndërkohë, SPAK, sa i përket mungesës së Veliajt, thotë se ai nuk ka marrë dijeni nga Drejtoria e Burgjeve për datën dhe orën e seancës.

“Siç rezulton nga rrethanat Erion Veliaj nuk ka marrë dijeni për datën dhe orën e seancës. Drejtoria e Burgjeve nuk ka marrë masat për njoftimin e Veliajt. Dhe duhen replkuar shkaqet. Përse burgjet s’e kanë njoftuar”, thotë SPAK.

Sipas SPAK, Veliaj akuzohet për korrupsion në 9 raste, pastrim parash, fshehje pasurie, shpërdorim detyre dhe futje e sendeve të paligjshme në burg. Edhe bashkëshortja e tij, Ajola Xoxa akuzohet për korrupsion në 9 raste për pastrim parash, mosdeklarim pasurie në dy raste dhe fshehje të të ardhurave.

Sipas hetimeve, Veliaj dhe Xoxa kanë përfituar në mënyrë të parregullt para dhe pasuri të paluajtshme në 9 raste të ndryshme nga kompani ndërtimi dhe OJF, të cilat në këmbim kanë marrë leje ndërtimi dhe fonde publike nga Bashkia.

Në këtë skemë, sipas SPAK, janë përfshirë edhe një sërë personash të tjerë. Gentian Sula, Fatmir Bektashi, Meriman Palushi, Shkëlqim Fusha dhe Sokol Kryeziu akuzohen për korrupsion aktiv, pasi dyshohet se kanë dhënë përfitime në këmbim të favoreve publike. Elman Abule, Valmir Xoxa dhe Adela Kondakçiu akuzohen për pastrim parash, ndërsa Linda Kazani, Erald Simixhiu dhe Ina Goxhaj akuzohen si për korrupsion aktiv ashtu edhe për pastrim parash.

Po ashtu, Frosina Bollo akuzohet për korrupsion aktiv, Mirton Lika për fshehje të ardhurash, ish deputetja socialiste Klotilda Bushka akuzohet për pengim të zbulimit të së vërtetës, Flutur Xhani për deklarime të rreme dhe Fatjon Baci për futje të sendeve të ndaluara në institucionet e vuajtjes së dënimit.

Nën akuzë janë vendosur edhe disa kompani dhe OJF, të cilat, sipas SPAK, kanë pasur rol në dhënien e përfitimeve dhe pastrimin e parave.