Banorët e Nikaj-Mërturit ngrihen në protestë: Nuk do të lejojmë shkatërrimin e lumit

Banorët e fshatit Nikaj-Mërtur, njësia administrative Lekbibaj, janë ngritur në protestë kundër ndërhyjeve që po kryhen në lumin Mërtur. Banorët thonë se prej rreth një jave, fadromat kanë nisur ndërhyrje në shtratin e Lumit dhe po kryhen gërmime për ndërtimin e tre digave të betonit, me përmasa tepër shqetësuese.

Banorët janë të shqetësuar, jo vetëm për ndërhyrjen dhe dëmin që po i shkaktohen natyrës në vetvete, por edhe për mungesën e transparencës. Ata shprehen se nuk janë vënë në dijeni për qëllimin e saktë të këtyre punimeve, ndërsa qëndrojnë të bindur se nuk do të lejojnë shkatërrimin e natyrës në zonën e tyre.

Ndërkohë sipas një tabele që lajmëron punimet, ndërhyrja në lumin Mërtur po kryhet nga Korporata Elektroenergjitike shqiptare, me qëllim “Mbrojtja me prita malore e Përroit të Merturit’-Loti 1, ndërsa afati i punimeve do të zgjasë deri në 24 javë.