Berisha: Rama mashtroi qytetarët lidhur me çmimin e naftës

Kryetari i Sali Berisha akuzoi kryeministrin Edi Rama për mashtrim ndaj qytetarëve lidhur me çmimet e naftës dhe për fshehjen e dështimeve në investimet e huaja.

Në një videomesazh të publikuar sot, Berisha kritikoi rritjen e çmimit të naftës nga bordi i karburanteve, duke theksuar se kjo tregon ndikimin e drejtpërdrejtë të qeverisë mbi çmimet. Ai kërkoi uljen e taksës mbi karburantet, që sipas tij është “themel i çmimit stratosferik të naftës në Shqipëri”.

“Bordi i tij dje njoftoi rritjen e çmimit nga 203 lekë në 215 lekë, duke dëshmuar se bordi është në mbrojtje të kompanive dhe jo të qytetarëve,” tha Berisha.

Kreu i PD-së kritikoi edhe deklaratat e kryeministrit për investimet e huaja, duke theksuar se gjatë 12 viteve të qeverisjes së Ramës nuk ka ardhur asnjë investitor serioz i ri.

Ai përmendi projektet që sipas tij u realizuan gjatë qeverisjes së PD-së, si Kaskada e Devollit, gazsjellësi trans-Adriatik dhe investimet e Shell, duke theksuar se investitorët e rinj janë larguar nga Shqipëria.