Besimtarët katolikë kremtojnë Vigjiljen e Pashkës në Tiranë, mesha zhvillohet në Katedralen “Shën Pali”

Besimtarë katolikë janë mbledhur në kryeqytet për të kremtuar Vigjiljen e Pashkës, një nga momentet më të rëndësishme të kalendarit të krishterë, ku kujtohet ringjallja e Jezu Krishtit.

Mesha solemne nisi rreth orës 22:00 në Katedralen “Shën Pali” në Tiranë, ku dhjetëra besimtarë morën pjesë në lutje, reflektim dhe rite fetare.

Kjo festë vjen pas periudhës 40-ditore të Kreshmës, gjatë së cilës besimtarët kanë ndjekur traditën e sakrificës dhe përmbajtjes, duke kufizuar ushqimin dhe duke u përkushtuar më shumë ndaj besimit.

Me rastin e Pashkës, besimtarët marrin pjesë edhe në meshën e mëngjesit dhe ndjekin zakonet tradicionale, si thyerja e vezëve të kuqe dhe shkëmbimi i urimeve festive.

Pashka mbetet gjithashtu një festë e rëndësishme familjare, e cila shënon momente bashkimi, faljeje dhe pajtimi, ku familjet mblidhen për të festuar së bashku.