Protestuesit janë mbledhur mbrëmjen e sotme pranë Bllokut të Sigurisë në rrugën “Mine Peza”, ku ndodhen qytetar&e...
AKTUALITET
Bilanci i pagesave preku deficitin më të ulët historik në vitin 2025
PiranjatPërditësimi i fundit 26 Mars 2026, 08:00
Bilanci i pagesave u përmirësua ndjeshëm vitin e kaluar dhe shënoi deficitin më të ulët historik.
Sipas Bankës së Shqipërisë, deficiti i llogarisë korrente kishte vlerën e 178 milionë eurove, 70% më pak krahasuar me vitin 2024. Kontributin kryesor e dha tremujori i tretë i vitit, ku falë prurjeve nga turizmi bilanci i llogarisë korrente rezultoi pozitiv për të dytin vit radhazi.
Përmirësimi i bilancit të llogarisë korrente gjatë 2025 erdhi kryesisht nga rritja e suficitit në shërbime, si edhe përmirësimi i bilancit për të ardhurat nga investimet dhe puna jashtë, si edhe nga rritja e remitancave, që kompensuan në pjesën më të madhe deficitin tregtar në mallra.
Deficiti i tregtisë së mallrave vitin e kaluar arriti në 5.96 miliardë euro, me një rritje prej 6.5% krahasuar me një vit më parë. Rritja e deficitit erdhi paralelisht nga rritja e mëtejshme e importeve dhe rënia e eksporteve.
Ndërkohë, bilanci tregtar në shërbime vitin e kaluar ishte pozitive në vlerën e gati 4.5 miliardë eurove, në rritje me 15% krahasuar me një vit më parë.
Pjesa dërrmuese e suficitit në shërbime erdhi nga turizmi. Statistikat treguan se të ardhurat neto në zërin e udhëtimeve të Bilancit të Pagesave kishin vlerën e 2.69 miliardë eurove, në rritje me 17% krahasuar me vitin 2024. Të huajt shpenzuan më shumë se 5.7 miliardë euro për udhëtime në Shqipëri vitin e kaluar.
Shpenzimet e turistëve të huaj u vlerësuan në rritje me 14.7%, ndërsa shpenzimet e shqiptarëve jashtë vendit u rritën në masë më të vogël, me 12.6%.
Ndërkohë që turizmi vazhdoi të rrisë kontributin e tij pozitiv në bilancin e pagesave, të ardhurat nga fasoneria iu kthyen rritjes vitin e kaluar.
Të ardhurat neto nga shërbimet për përpunim të inputeve fizike të zotëruara nga të tjerët u rritën në 699 milionë euro, 5.6% më shumë krahasuar me një vit më parë.
Sektori i fasonerisë në vitet e fundit është goditur rëndë nga mbiçmimi i fortë i Lekut në kursin e këmbimit me euron dhe rritja e pagave, sidomos në aktivitetet e prodhimit të veshjeve dhe këpucëve. Megjithatë, të paktën duke iu referuar shifrave të Bankës së Shqipërisë, viti i kaluar rezultoi në përmirësim.
Kontribut në rritje në bilancin e llogarisë korrente dhanë përsëri remitancat. Vitin e kaluar, dërgesat e emigrantëve arritën vlerën e 1.1 milardë eurove, në rritje me 7.3% krahasuar me një vit më parë. Valët e reja të emigrimit të shqiptarëve në vitet e fundit kanë rimëkëmbur remitancat, duke ndikuar pozitivisht bilancin e llogarisë korrente të vendit.
Ndërkohë, edhe të ardhurat nga puna jashtë vendit u rritën më tej në 714 milionë euro, 14.6% më shumë krahasuar me vitin 2024.
Përmirësimi i bilancit të llogarisë korrente mund të shpjegojë në një masë të madhe vijimësinë e forcimit të Lekut në kursin e këmbimit valutor. Sipas statistikave të Bankës së Shqipërisë, Euro u këmbye mesatarisht vitin e kaluar me 97.85 lekë, niveli më i ulët i regjistruar ndonjëherë. Forcimi i Lekut ka vazhduar edhe në tremujorin e parë të këtij viti, duke arritur rekorde të reja historike, poshtë kufirit të 96 lekëve. / Monitor
