Borë në pranverë, ja si pritet të jetë moti në fundjavë

Fundjava në vend pritet të karakterizohet nga kushte të paqëndrueshme atmosferike, me temperatura të ulëta dhe reshje shiu e dëbore, të paktën edhe gjatë 24 orëve në vijim.

Sipas meteorologes Lajda Porja, një masë ajrore e ftohtë që ka zbritur nga Europa Veriore drejt asaj Qendrore ka përfshirë edhe rajonin e Ballkanit, duke sjellë reshje dëbore në shumë zona. Edhe pse situata mbetet e paqëndrueshme, intensiteti i reshjeve pritet të jetë më i ulët.

Reshjet do të jenë të pranishme kryesisht në pjesën lindore të Shqipërisë, ndërsa në zonat malore ato do të bien në formën e dëborës dhe do të vijojnë edhe gjatë ditës së shtunë. Ndërkohë, temperaturat kanë pësuar rënie të ndjeshme, duke arritur në vlera negative. Të shtunën, ato pritet të luhaten nga 0 deri në -2 gradë Celsius, ndërsa mëngjeset do të jenë të acarta.

Parashikimet tregojnë se dita e diel do të sjellë përmirësim të kushteve atmosferike, me ndërprerje të reshjeve dhe stabilizim të motit. Edhe situata e erërave në zonat detare pritet të vijë drejt përmirësimit.