Denoncim nga Njësia Velabisht, Berat/ Rrugë e amortizuar vetëm 1.5 km nga qyteti (VIDEO)

Banorë të Njësisë Velabisht, pranë qytetit të Beratit kanë ngritur shqetësimin për gjendjen e rënduar të rrugës që lidh zonën e tyre me qytetin. Edhe pse vetëm rreth 1.5 kilometra larg Beratit, kjo rrugë prej vitesh ndodhet në kushte të papranueshme.

Sipas banorëve, rruga është e dëmtuar rëndë me gropa dhe zhavorr të shpërndarë, duke e bërë të vështirë dhe në disa raste të pamundur kalimin e mjeteve të vogla. Ata shprehen se, pavarësisht detyrimeve që paguajnë, nuk kanë marrë investimin e duhur nga bashkia.

“Sa herë afrohen zgjedhjet premtohet asfaltim apo betonim, por në fund hidhet vetëm zhavorr që prishet shumë shpejt,” shprehen banorët për Piranjat news.

Ata theksojnë se ndërhyrjet kanë qenë të pjesshme dhe pa standarde, ndërsa prej më shumë se 15 vitesh nuk është bërë asnjë investim serioz për rikonstruksionin e plotë të rrugës. Gjendja aktuale ka vështirësuar jetën e përditshme të banorëve, veçanërisht për të moshuarit, ndërsa automjetet shpesh nuk arrijnë të ngjiten për shkak të terrenit të dëmtuar.

Banorët i bëjnë thirrje Bashkisë Berat që të ndërhyjë urgjentisht për rikonstruksionin e plotë të kësaj rruge, duke kërkuar një zgjidhje afatgjatë dhe jo ndërhyrje të përkohshme që nuk i rezistojnë kohës.

Ata theksojnë se është e papranueshme që një zonë kaq pranë qytetit të mbetet në këtë gjendje për kaq shumë vite./Piranjat news