Denoncimi i banorëve të Nishtullës: Po na mbyt tymi i mbetjeve prej 5 vitesh, askush nuk merr masa

Në redaksinë e Piranjat News ka mbërritur një denoncim i një qytetari nga lagja Nishtullë e Durrësit, i cili ankohet për situatën e rëndë mjedisore që po vazhdon prej pesë vitesh.

Sipas denoncuesit, në zonë hidhen çdo lloj mbeturinash dhe më pas digjen, duke krijuar tym të dendur që po i mbyt banorët. “Kjo situatë në Nishtullë, Durrës, ka 5 vite që është kështu. Hedhin çdo lloj mbetjeje që është e mundur. Është bërë situatë e pamundur për të vazhduar kështu, po na mbysin me këtë tym!” – shkruan qytetari.

Ai shton se Bashkia e Durrësit ka vendosur kamera në zonë, por sipas tij kjo masë ka rezultuar e kotë, pasi askush nuk arrestohet. “Policia paguhet, prandaj askush nuk merr masa!” – pohon denoncuesi, i cili i bën thirrje institucioneve të ndërhyjnë sa më parë.

Në fund të mesazhit, qytetari paralajmëron se nëse nuk merren masa, banorët do të detyrohen të veprojnë vetë: “Ju lutem bëni diçka, se po shkojmë në vetëgjyqësi.”/ Piranjat News