Situata e rëndë/ Denoncimi i gazetarit: Pacientja e prekur nga kanceri prej 3 muajsh pa trajtim! Asnjë spital nuk e kuron

Gazetari Osman Stafa ka bërë publik një denoncim për rastin e një paciente nga Korça, e cila, sipas denoncimit, prej më shumë se tre muajsh po përballet me një situatë të rëndë shëndetësore dhe ende nuk ka marrë zgjidhjen e nevojshme për trajtimin e saj.

“Kam motrën me të meta mendore dhe ka një gjendje në gjoks. Ka tre muaj e gjysmë që e çojmë nga Korça në Tiranë dhe nga një spital te tjetri. Spitali i Elbasanit nuk e mbajti, e çuam në Onkologjik, por as atje nuk e morën përsipër”, shprehet motra e pacientes.

Në një video të publikuar në rrjetet sociale, gazetari Osman Stafa u bën thirrje institucioneve shëndetësore, veçanërisht Ministrisë së Shëndetësisë, që të ndërhyjnë urgjentisht për rastin.

“Është urgjente që Ministria e Shëndetësisë të reagojë dhe të gjejë zgjidhje për rastin e zonjës nga Korça”, shprehet Stafa në denoncimin e tij.

Sipas gazetarit, pacientja me probleme të shëndetit mendor është lënë në një situatë të vështirë, ndërsa familjarët po përballen gjithashtu me rëndesën emocionale të gjendjes së saj.

“3 muaj e ca, dhe asnjë spital në Korçë e Tiranë nuk i ka dhënë një zgjidhje. Vetëm e kanë përcjellë nga njëri spital në tjetrin”, thuhet në denoncimin e bërë publik nga gazetari Osman Stafa.

Gazetari Osman Stafa kërkon që institucionet përgjegjëse të reagojnë dhe të sigurojnë një zgjidhje për pacienten, duke e konsideruar rastin urgjent.