Denoncimi/ Kanali i bllokuar rrezikon të mbjellat në Divjakë, fermerët akuzojnë bashkinë për neglizhencë

Fermerë në zonën e Divjakës kanë ngritur shqetësimin për gjendjen e rënduar të kanalit kryesor vaditës, i cili sipas tyre është lënë në harresë nga bashkia, pavarësisht fondeve të dhëna për mirëmbajtjen.

Sipas denoncimit, bashkia ka shpenzuar rreth 5.5 milionë lekë të vjetra për pastrimin e kanalit, por në terren situata paraqitet ndryshe. Pamjet tregojnë një kanal të mbuluar nga barishtet dhe i bllokuar, duke penguar rrjedhën e ujit drejt tokave bujqësore.

Fermerët shprehen se për shkak të kësaj gjendjeje, të mbjellat, veçanërisht patatet nuk po furnizohen me ujë, duke rrezikuar prodhimin dhe të ardhurat e tyre. Ata theksojnë se kanali kryesor nuk po funksionon si duhet dhe kërkojnë ndërhyrje urgjente.

Sipas tyre, problematika është e njohur prej kohësh, ndërsa mungesa e ndërhyrjes po përkeqëson situatën në terren.

Banorët i bëjnë thirrje institucioneve përgjegjëse që të verifikojnë gjendjen dhe të ndërhyjnë për zhbllokimin e kanalit, në mënyrë që të garantohet ujitja për tokat bujqësore./Piranjat news