Denoncimi/ Nuk plotëson kriteret, emërimi i dyshimtë i drejtorit të MZSH-së në Mallakastër

Në krye të drejtorisë së Mbrojtjes nga Zjarri dhe Shpëtimit në Bashkinë e Mallakastrës është emëruar së fundmi Mandi Aliaj, emërim që me sa duket është bërë në shkelje të rregullave të emërimit në këtë detyrë.

Në bazë të ligjit, kandidati për të drejtuar këtë drejtori duhet të jetë me formim ushtarak, policor, juridik ose inxhinieri, por Aliaj nuk plotëson asnjë nga kriteret. Sipas denoncimit të mbërritur në redaksinë e “PiranjaveNews”, drejtori i ri ka mbaruar studimet për “Shkenca Politike dhe Administrative”, në një nga universitetet private në Tiranë me rezultate dukshëm të ulëta.

Në dosjen për emërimin e tij në këtë detyrë, Aliaj ka paraqitur vetëm një vërtetim studimesh dhe jo diplomë universitare dhe sipas denoncimit, kandidatura është refuzuar më parë për mungesë dokumentacioni dhe probleme verifikimi. Megjithatë, ajo që ia ka lehtësuar rrugën drejt këtij posti është lidhja me Partinë Socialiste në pushtet.

Në një foto të publikuar në rrjetet sociale nga kryetari i Partisë Socialiste në Mallakastër, Zamir Malasi, shihe deputeti i Partisë Socialiste në këtë zonë, Klevis Jahaj, ku i pranishëm është edhe drejtori i Mbrojtjes nga Zjarri dhe Shpëtimit, duke marrë pjesë kështu në një aktivitet politik.

Ky element ngre dyshime mbi respektimin e kritereve për emërimet në detyrë. Gjithashtu, ish-shefi i mëparshëm i këtij sektori në Mallakastër është larguar për arsye të ngjashme, për pjesëmarrje në aktivitetet elektorale të Partisë Demokratike. /PiranjatNews/

Galeria fotografike (

)