Ministria e Drejtësisë ka reaguar lidhur me transferimin e Erion Veliajt nga ambientet e paraburgimit, duke sqaruar se lëvizja drejt Institucioni...
AKTUALITET
EMRI/ Detaje nga atentati me 10 kg eksploziv ndaj biznesmenit, zbulohet kush është shqiptari që dha urdhrin nga burgu grek!
PiranjatPërditësimi i fundit 27 August 2026, 17:20
Policia greke ka zbardhur atentatin me eksploziv të planifikuar në janar 2026 ndaj një biznesmeni greko-amerikan në Lefkada, duke arrestuar tetë persona të përfshirë në këtë çështje.
Sipas dosjes së Departamentit të Ndjekjes së Krimeve me Zhvatje, urdhri për sulmin dyshohet se ka dalë nga burgu i Malandrinos.
Hetuesit kanë identifikuar si urdhërues të dyshuar 46-vjeçarin shqiptar Mikel Selimaj, nga Vlora, dhe 31-vjeçarin grek Evstratios Nousis. Të dy ndodhen në burg dhe dyshohet se kanë komunikuar me gjashtë bashkëpunëtorë jashtë qelive për organizimin e atentatit.
Objektivi ishte një biznesmen greko-amerikan, i cili jeton në Shtetet e Bashkuara dhe qëndron në Greqi gjatë muajve të verës.
Sipas hetimeve, gjashtë personat që vepronin jashtë burgut, mes tyre edhe një grua, vendosën një pajisje shpërthyese në vilën e biznesmenit në zonën pranë Agiofyllit, në Lefkada.
Pajisja përmbante rreth 10 kilogramë dinamit xhelatine dhe ishte pajisur me fitil. Atentati nuk u realizua pasi kujdestari i pronës zbuloi eksplozivin në ballkonin e pasmë të vilës.
Hetimet e policisë greke kanë rindërtuar më pas lidhjet mes personave që vendosën eksplozivin dhe dy të burgosurve që dyshohen se dhanë urdhrin.
Mikel Selimaj rezulton me precedentë për drogë, vjedhje dhe grabitje. Ai ndodhet në burg që prej majit 2025, i akuzuar për vrasjen me armë zjarri të 41-vjeçarit Altin Arapaj në Rafina.
Edhe Evstratios Nousis ndodhet prej vitesh në burg. Sipas dosjes, precedentët e tij datojnë nga viti 2015. Në janar 2026 ai akuzohet se plagosi në burg 46-vjeçarin nga Gjirokastra, Dhimo Meci.
Gjashtë personat e arrestuar që dyshohet se morën pjesë në organizimin dhe ekzekutimin e planit akuzohen për formim bande dhe shkelje të legjislacionit për armët dhe eksplozivët.
Në të njëjtën dosje, Selimaj dhe Nousis hetohen si nxitësit e sulmit, ndërsa policia greke e ka lidhur planin për atentatin me komunikimet që dyshohet se janë kryer nga brenda burgut të Malandrinos.
