Dhunuan 17-vjeçaren në Fier, nëna e një prej dhunueseve: Kërkoj falje publike, vajza është me probleme të shëndetit mendor

Një prej familjeve të vajzave që dhunuan 17-vjeçaren në Fier ka kërkuar falje publike për sjelljen e rëndë të vajzës së tyre kundrejt një tjetre.

Nëna e një prej autoreve të dhunës së shëmtuar që ka tronditur opinion publik, tregon se lajmin e mësoi në media e më pas është shoqëruar në polici.

Ajo ka kërkuar falje publike për ngjarjen të cilën thotë se e mësoi nga mediat.

“Më mori policia, nuk di gjë. Ju kërkoj ndjesë prindërve të asaj goce. Sikur të më kishte ndodhur mua, do t’i kërkoja 100 herë ndjesë. Jam shumë e prekur, sikur t’ia kishin bërë fëmijës tim. Po vajzën e kemi çuar për ta vizituar dhe është me probleme. Psikologia e shkollës e ka marrë, por s’ka bërë asgjë”, tha në një intervistë për mediat, e ëma e 15-vjeçares.

Prindërit bëjnë me dije se vajza e tyre është diagnostikuar 3 muaj me pare me probleme të shëndetit mendor dhe se prej kohësh kanë kërkuar ndihmë pranë institucioneve për trajtimin e saj.

Sipas tyre, ajo kishte shfaqur edhe më parë episode agresiviteti, por kërkesat për mbështetje nuk kanë marrë përgjigjen e nevojshme.