Dhunuan dhe grabitën të moshuarën italiane, arrestohen 3 ‘skifterët’ shqiptarë

Tre shqiptarë me dënime të shumta penale u arrestuan nga Karabinierët e Kompanisë Cuneo në Itali, të cilët ekzekutuan një urdhër paraprak ndalimi të lëshuar nga gjyqtari hetues i gjykatës lokale, me kërkesë të Prokurorisë.

Të tre ‘skifterët e arrestuar midis Piemontes dhe Ligurias, besohet se janë përgjegjës për një valë vjedhjesh dhe grabitjesh, me sulme në zona të ndryshme të provincës, disa prej tyre edhe me dhunë ndaj pronarëve të banesave.

Sulmi më brutal ndodhi natën e 25 qershorit në Caraglio, kur tre autorët, me fytyrat e mbuluara dhe të armatosur me një shpatë dhe një çekiç të rëndë muratori, hynë me forcë në shtëpinë e një gruaje tetëdhjetëvjeçare, e njohur në fshat si pronare e një lokali.

Bastisja e shpejtë dhe e dhunshme zgjati vetëm katër minuta, gjatë së cilës gruaja e moshuar, e kërcënuar me armë dhe e rrahur, u detyrua të dorëzonte paratë dhe bizhuteritë e arit që kishte në zotërim.

Menjëherë pas kësaj, banditët ikën duke dalë nga kati i parë i shtëpisë dhe u zhdukën në errësirën e fushave përreth.

Hetimi i karabinierëve filloi menjëherë, duke ngushtuar numrin e të dyshuarve. Hetuesit jo vetëm që rindërtuan dinamikën e grabitjes në Caraglio, por gjithashtu identifikuan grupin si përgjegjës për një seri vjedhjesh banesash të kryera gjatë dy ditëve në vijim në komunat Roccabruna, Busca, Borgo San Dalmazzo dhe Roccavione.

Sipas hetimit, ishte një bandë e vërtetë shëtitëse që udhëtonte nëpër Italinë veriore duke përdorur makina me qira, ndërrohej shpesh për të shmangur kontrollet e policisë, informon media italiane.

Brenda pak javësh hetimesh intensive, të kryera nëpërmjet operacioneve teknike dhe tradicionale, Karabinierët identifikuan, gjetën vendndodhjen dhe arrestuan tre shqiptarët në komunat e Cuneos, Mondovì dhe La Spezia, duke i dërguar në burg.