Dhunuan turistin italian pranë Pallatit të Kulturës, procedohen penalisht 8 të mitur 

Tetë të mitur, të moshës 13 deri në 15 vjeç, janë proceduar penalisht nga Policia e Tiranës në lidhje me përplasjen fizike ku mbeti i dëmtuar lehtë një 20-vjeçar italian pranë Pallatit të Kulturës.

Pas hetimeve, ngjarja ka ndodhur në 29 korrik. Specialistët e Komisariatit të Policisë Nr. 1 kanë bërë të mundur shoqërimin dhe procedimin në gjendje të lirë të të miturve, të dyshuar si pjesë e grupit të përfshirë në përplasjen fizike me turistin italian.

“Si rezultat i veprimeve të shpejta hetimore, të kryera menjëherë pas konfliktit, specialistët për Hetimin e Krimeve në Komisariatin e Policisë Nr. 1 bënë të mundur identifikimin, shoqërimin dhe procedimin në gjendje të lirë të 8 shtetasve të mitur, të moshës 13-15 vjeç, të dyshuar si të përfshirë në konflikt, gjatë të cilit 20-vjeçari italian pësoi lëndime të lehta trupore”, njofton policia.