Digjet edhe Lura, flakët përhapen me shpejtësi nëpër pyje

Një tjetër vatër zjarri është shfaqur në vend. Flakët kanë përfshirë një zonë pyjore në Lurë, ndërsa tymi i zi ka mbuluar të gjithë zonën. Pamjet tregojnë situatën alarmante në zonë, ku zjarri vijon të përhapet me shpejtësi në pjesën pyjore.

Prej ditësh vendi është përfshirë nga zjarret, ndërsa situata më alarmante është paraqitur në Krujë, ku në rrezik kanë qenë dhe zonat e banuara. Zjarrfikësit kanë luftuar për neutralizimin e flakëve, mirëpo terreni i vështirë dhe era e fortë në zonë ja kanë vështirësuar punën.

Ndërkohë, ditën e sotme një zhvillim tjetër ka tërhequr vëmendjen. Në një kohë kur vendi po përballet me vatra të shumta zjarri, drejtori i Përgjithshëm i Zjarrfikëses, Arben Cara, ka dhënë dorëheqjen.

Burime për mediat bënë me dije se Cara është larguar nga detyra për arsye personale. Deri më tani ai nuk ka bërë një reagim lidhur me dorëheqjen.