Ambasadori i Gjermanisë në Shqipëri, Karl Bergner i kujton kryeministrit Rama se në rrugën për integrimin në B...
AKTUALITET
Dita e gjashtë e protestës për Zvërnecin/ Qytetarët sërish para Kryeministrisë, kërkohet largimi i Ramës
PiranjatPërditësimi i fundit 5 Qershor 2026, 18:25
Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë për protestën e gjashtë radhazi kundër projektit turistik në Zvërnec, duke marshuar drejt godinës së Kryeministrisë.
Tubimi zhvillohet një ditë pasi organizatorët publikuan pesë kërkesa që i drejtohen qeverisë, duke argumentuar se çështja e Zvërnecit nuk lidhet vetëm me një projekt të veçantë, por me një sërë vendimesh dhe ndryshimesh ligjore që, sipas tyre, kanë favorizuar interesa private në kurriz të interesit publik.
Mes kërkesave të protestuesve është dorëheqja e qeverisë, të cilën e konsiderojnë përgjegjëse për politikat që kanë çuar në situatën e krijuar në Zvërnec. Ata kërkojnë gjithashtu shfuqizimin e statusit dhe kuadrit ligjor për investitorët strategjikë, anulimin e Paketës së Maleve, shfuqizimin e ndryshimeve në ligjin për Zonat e Mbrojtura, si dhe anulimin e ndryshimeve në ligjin për trashëgiminë kulturore shqiptare.
Sipas organizatorëve, këto pesë pika përbëjnë bazën e kundërshtimit të tyre ndaj politikave të ndjekura nga qeveria në raport me territorin, mjedisin dhe pasuritë publike.
Protesta e sotme është e gjashta radhazi që zhvillohet në kryeqytet pas tensioneve të regjistruara në zonën e Pishë Poros, ku banorë dhe aktivistë kundërshtuan punimet e lidhura me projektin turistik. Organizatorët kanë paralajmëruar se mobilizimi do të vijojë edhe në ditët në vazhdim deri në marrjen e një përgjigjeje nga qeveria për kërkesat e paraqitura.
