Divjaka në këmbë kundër 'Territorjales' ! Dita e gjashtë e protestës kundër shkrirjes së bashkisë

Banorët e Divjakës janë ngritur sërish në protestën e gjashtë radhazi, duke shprehur kundërshtimin e tyre të fortë ndaj propozimit të Partisë Socialiste për hartën e re territoriale, e cila parashikon shkrirjen e Bashkisë Divjakë dhe bashkimin e saj me atë të Lushnjes.

Në tubimin e djeshëm, qytetarët u shprehën të vendosur për të mos lejuar këtë ndryshim administrativo-territorial dhe kërkuan angazhimin e drejtpërdrejtë të të gjithë deputetëve të zonës, pavarësisht krahut politik, për të mbrojtur interesat e komunitetit të tyre.

Mësohet se, banorët kërkuan që deputetët e votuar nga qytetarët, si nga e majta ashtu edhe nga e djathta, të ngrihen në mbrojtje të Divjakës dhe të pengojnë kalimin e këtij projektligji. Protestuesit paralajmëruan se tubimet dhe mosbindja ndaj këtij projekti do të vazhdojnë çdo ditë deri në tërheqjen përfundimtare të qeverisë nga plani për bashkimin me Lushnjen.