Dokumenti/ Qytetari kishte fituar gjyqin, IKMT shemb banesën dy-katëshe me urdhër të Afrim Qëndros!

Inspektoriati Kombëtar i Mbrojtjes së Territorit ka prishur sot një banesë dy-katëshe në qytetin e Vlorës në bashkëpunim me IMT, me pretendimin se pengonte lidhjen e portit detar me rrugën Transballkanike. Edhe pse ka pasur rezistencë nga ana e pronarëve, në fund shtëpia është rrafshuar me urdhër të Afrim Qëndros.

Në fotot duket dokumenti ku kryeinspektori Qendro ka firmosur vendimin e datës 2 prill të 2026-tës, teksa në lagjen “2 Maji” është konstatuar një banesë dy-katëshe pa leje ndërtimi. Pronarët kanë kundërshtuar këtë vendim të IKMT-së duke deklaruar se janë të pajisur me vërtetim pronësie dhe certifikatë pronësie, si dhe legalizim qysh prej vitit 1993-të.

Ajo që bie në sy është që vendimi është firmosur vetëm një ditë më parë dhe pa mbushur 24 orë, rruspat kanë mbërritur në shtëpinë e familjes Çuni duke e rrafshuar paraditen e sotme.

Edhe pse ligji parashikon që çdo posedues objekti duhet të lajmërohet përpara shembjes së tij, duke respektuar afatatet ligjore, në Vlorë kanë nxituar që ta hedhin në tokë pa kaluar edhe një ditë.

Burime të besueshme tregojnë për Newsbomb.al që familja Çuni e kishte çuar çështjen në gjykatë për njohjen e pronësisë, ku kishte mundur ta fitonte në Shkallën e Parë, ndërsa aktualisht ndodhet në Apel përballë Kadastrës. Edhe pse togat e zeza nuk kanë dalë me një vendim final që të prezumojë ose jo pronësinë e tyre, IKMT ka vijuar me ekzekutimin e vendimit për shembjen e objektit.