16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
Dosja e AKSHI-t/ Apartament, llogari bankare dhe automjete, Mirlinda Karçanaj dhe 4 persona të tjerë kërkojnë zhbllokimin e pasurive të sekuestruara
PiranjatPërditësimi i fundit 16 September 2026, 18:49
Pesë persona i janë drejtuar Gjykatës së Lartë, duke kërkuar heqjen e masave të sekuestros të vendosura mbi pasuritë e tyre në kuadër të hetimeve për skemën e dyshuar të tenderave në AKSHI.
Sipas informacioneve paraprake, mes personave që kërkojnë zhbllokimin e pasurive është ish-drejtoresha e AKSHI-t, Mirlinda Karçanaj. Në emër të saj janë vendosur në sekuestro një apartament, llogari bankare, tokë dhe dy automjete. Kërkesë të ngjashme ka bërë edhe biznesmeni Ermal Beqiri, ndërsa pasuritë e sekuestruara në emër të tij përfshijnë automjete, llogari bankare, truall, tokë, një ndërtesë dhe një jaht.
Mësohet se, në procedurë janë përfshirë edhe kompanitë Soft Solutions dhe Horizont. Beqiri ndodhet aktualisht i ndaluar në Francë, ndërsa autoritetet vijojnë procedurat për ekstradimin e tij drejt Shqipërisë, teksa në Gjykatën e Lartë kanë kërkuar gjithashtu heqjen e sekuestrove Arjola Koromani dhe Xhemila Tamizi. Sipas hetimeve, në emër të Tamizit ishte regjistruar një jaht luksoz që dyshohet se ishte i lidhur me Beqirin.
Hetimi për dosjen e AKSHI-t po zhvillohet nga prokurorët Altin Dumani dhe Bledar Maksuti dhe aktualisht ndodhet në fazën e hetimeve. SPAK dyshon se personat e përfshirë kanë krijuar një skemë për përfitimin e fondeve publike përmes manipulimit të procedurave të tenderimit, paracaktimit të fituesve dhe kalimit të shumave të konsiderueshme drejt një kompanie fiktive.
Sipas akuzës, në këtë skemë dyshohet se janë përdorur edhe persona me lidhje me krimin e organizuar për të larguar konkurrentët. Të dyshuarit përballen gjithashtu me akuza që lidhen me pastrimin e parave. Në kuadër të këtij hetimi, në burg ndodhet edhe Ergys Agasi, i arrestuar disa javë më parë në zonën e Plazhit në Durrës.
