Një prej protestuesve të mbledhur para zyrave të EULEX-it në Fushë-Kosovë ka reaguar me lot në sy pas vendimit të Gjyk...
AKTUALITET
Dyshohet se përndiqte një grua dhe tentoi ta merrte me forcë në makinë, arrestohet 32-vjeçari!
PiranjatPërditësimi i fundit 8 Prill 2026, 11:35
Një 32-vjeçar është arrestuar nga policia në Librazhd pasi tentoi të merrte me forcë në makinë një grua që e kishte përndjekur prej kohësh.
Policia bën me dije se 32-vjeçari me inicialet D. K kishte përndjekur prej një viti e gjysmë një 39-vjeçare ndërsa më pas ka tentuar ta marrë edhe me forcë në automjetin e tij. I riu ka goditur me grushte edhe personin që e shoqëronte gruan në fjalë dhe më pas është larguar.
Ngjarja u shënua në ambientet e jashtme të një karburanti në Librazhd, 32-vjeçari u kap në hyrje të Elbasanit, ndërsa nga verifikimet, rezultoi se ai drejtonte automjetin në gjendje të dehur.
Njoftimi i policisë:
DVP Elbasan/Finalizohet operacioni i koduar “Insistimi”.
Operacioni, nga shërbimet e Drejtorisë Vendore të Policisë Elbasan, në bashkëpunim me shërbimet e Komisariatit të Policisë Librazhd.
Tentoi të merrte me forcë, në automjet, 39-vjeçaren që kishte përndjekur 1 vit e gjysmë, kapet dhe vihet në pranga 32-vjeçari.
I arrestuari gjithashtu dhunoi shtetasin me të cilin shoqërohej 39-vjeçarja, dhe u largua nga vendngjarja.
32-vjeçari u kap në hyrje të Elbasanit, teksa drejtonte automjetin, në gjendje të dehur.
Sekuestrohen automjeti dhe celulari i këtij shtetasi.
Menjëherë pas njoftimit se disa shtetas ishin konfliktuar në ambientet e jashtme të një karburanti në Librazhd, shërbimet e Policisë shkuan në vendngjarje, me qëllim sqarimin e rrethanave të rastit dhe identifikimin e shtetasve të përfshirë.
Nga veprimet hetimore të kryera në kuadër të operacionit të koduar “Insistimi”, rezultoi se shtetasi D. K., 32 vjeç, banues në fshatin Perondi, Kuçovë, kishte tentuar të merrte me forcë, në automjet, një shtetase 39 vjeçe, të cilën dyshohet se e kishte përndjekur 1 vit e gjysmë. Më pas, 32-vjeçari kishte goditur me grushte, shtetasin që shoqëronte 39-vjeçaren, dhe ishte larguar.
Si rezultat i veprimeve të shpejta operacionale, 32-vjeçari u kap dhe u vu në pranga në hyrje të qytetit të Elbasanit. Nga verifikimet e mëtejshme, rezultoi se ai drejtonte automjetin, në gjendje të dehur.
Materialet procedurale iu referuan Prokurorisë së Elbasanit, për veprime të mëtejshme.
