Ministria e Drejtësisë ka reaguar lidhur me transferimin e Erion Veliajt nga ambientet e paraburgimit, duke sqaruar se lëvizja drejt Institucioni...
AKTUALITET
“E arrestuan se kishte vezë dhe domate”/ Arben Kola denoncon ndalimin e protestuesit: Lirojeni menjëherë!
PiranjatPërditësimi i fundit 28 August 2026, 20:22
Aktivisti Arben Kola ka denoncuar nga protesta para Kryeministrisë ndalimin e një protestuesi, duke pretenduar se ai është shoqëruar nga policia pasi kishte me vete vezë dhe domate.
Në ditën e 90-të të protestës qytetare, Kola e ironizoi rastin duke i cilësuar vezët dhe domatet “armë të rrezikshme”, ndërsa kërkoi lirimin e menjëhershëm të protestuesit.
Ai lëshoi akuza edhe ndaj drejtuesve të Policisë së Shtetit, të cilën e cilësoi si “policia e turpit”.
“Sot ishte njoftuar një tubim qytetar para PS-së, por iu kishte hyrë frika dhe kishin ndryshuar vendin e takimit. U mbyllën të shkretët te Pallati i Brigadave. Mirëpo, kishin dalë nja 10 vetë, kurse një qytetar kishte marrë ca armë të rrezikshme: domate zemër kau dhe vezë. Lironi qytetarin sa më parë. Në asnjë vend të botës nuk ndodh që të arrestohet vetëm se ka vezë apo banane, në asnjë vend”, tha Kola.
Aktivisti i drejtoi gjithashtu një thirrje ministrit të Brendshëm për lirimin e protestuesit.
“Thirrje për ministrin e Brendshëm: ti e ke firmosur faqen tënde të turpit, por të lutem, sa më parë lironi protestuesin, pasi ndryshe do të përballeni me pasojat e qytetarëve”, deklaroi ai.
Në fjalën e tij, Kola u ndal edhe te 90 ditët e protestës, duke bërë thirrje që qytetarët të vijojnë tubimet deri në largimin e qeverisë.
“90 net me vetëdije kombëtare. Nuk është e lehtë, pasi kemi dhe ideologji të ndryshme. Por tani le të bëhemi dhe për aq ditë sa ka nevojë ky shesh, deri në rrëzimin e kësaj qeverie të korruptuar”, tha Kola.
Pretendimi mbi arsyen e ndalimit të protestuesit është bërë nga aktivisti gjatë fjalimit dhe, nga informacioni i dhënë, nuk ka ende një version zyrtar të Policisë së Shtetit për rrethanat e shoqërimit.
