E pazakontë/ Trafikanti i drogës shmang dëbimin në Shqipëri, pasi vajza e tij vuan nga urinimi në shtrat

Një ngjarje e pazakontë ka shkaktuar debat në Britani: një trafikant droge ka arritur të shmangë dëbimin drejt Shqipërisë, pasi gjykata mori parasysh se vajza e tij vuan nga makthet dhe urinimi në shtrat.

Shpresim Koka bindi një gjyqtar të gjykatës së emigracionit se kthimi i tij në Shqipëri do të ishte “tepër i rëndë” për vajzën e tij, për shkak të problemeve që ajo kishte me urinimin gjatë natës.

Gjykata dëgjoi se makthet dhe episodet e urinimit në shtrat te vajza ishin përkeqësuar sa herë që Koka, 38 vjeç, ndodhej në burg.

Një punonjës social paralajmëroi gjithashtu se vajza kishte nevojë për “ndërhyrje terapeutike”.

Koka kishte deklaruar se ishte refugjat nga Kosova kur mbërriti në Britani në vitin 2001, në moshën 14-vjeçare.

Në vitin 2017 ai u dënua me 21 muaj burg pasi ndihmoi një grup kriminal droge në pastrimin e parave. Ai u kap nga Agjencia Kombëtare e Krimit (National Crime Agency) teksa dorëzonte më shumë se 300 mijë paund në Park Royal, në perëndim të Londrës.

Pas përfundimit të dënimit, Koka duhej të dëbohej nga Britania, por ai qëndroi ende në vend.

Në vitin 2022 ai u dënua sërish, këtë herë me tre vite burg për trafik kokaine.

Ai apeloi ndaj planeve të reja për dëbimin e tij, duke argumentuar se vajza e tij do të vuante pas largimit të tij. Në shkurt të vitit të kaluar, një gjykatë e nivelit të parë për emigracionin vendosi se: “Efekti mbi vajzën do të ishte tepër i rëndë”.

Ministria e Brendshme britanike e kundërshtoi këtë vendim dhe është urdhëruar zhvillimi i një seance të re gjyqësore.

Robert Bates, nga Qendra për Kontrollin e Migracionit, deklaroi: “Ky person nuk duhet të lejohet të vazhdojë të dëmtojë rrugët e Britanisë. Përndryshe, vajza e tij mund të kthehet bashkë me të në Shqipëri.”/Përktheu Piranjat News, marrë nga The Sun