E rëndë në Memaliaj, humb jetën gjatë transportit për në spital një foshnjë 6-muajshe

Një ngjarje e rëndë është regjistruar në fshatin Maricaj, ku një foshnjë 6-muajshe ka humbur jetën teksa po transportohej për të marrë ndihmë mjekësore.

Sipas burimeve për Piranjat News, foshnja kishte shfaqur fillimisht shqetësime shëndetësore, si të vjella dhe probleme me barkun. Ajo ishte dërguar në repartin e Pediatrisë, ku kishte marrë ndihmë mjekësore dhe trajtim. Disa ditë pas daljes nga spitali, gjendja e saj është përkeqësuar sërish, këtë herë me temperaturë të lartë.

Prindërit e kanë nisur menjëherë drejt Spitalit të Memaliajt për të kërkuar ndihmë mjekësore, por, sipas informacioneve paraprake, foshnja ka ndërruar jetë gjatë rrugës.

Policia ka nisur hetimet për zbardhjen e plotë të rrethanave të ngjarjes. Në kuadër të tyre janë marrë në pyetje dy mjekë pediatër, të cilët kanë dorëzuar dokumentacionin dhe kartelat mjekësore të foshnjës.

Shkaqet e sakta të vdekjes pritet të përcaktohen pas ekspertizës mjeko-ligjore, ndërsa hetimet vijojnë.