Ndryshon orari i qarkullimit në pikën e kalimit kufitar të Qafë Botës.
Autoritetet greke kanë rikthyer orarin dimëror, duke ...
AKTUALITET
Ekskluzive/ Nga goditja me gotë te përleshja në hotel, “Piranjat News” sigurojnë fotot e momentit para sherrit
PiranjatPërditësimi i fundit 1 September 2026, 13:36
Në vijim të përplasjes së ndodhur në një hotel në Malin e Robit, Golem, në redaksinë e “Piranjat News” kanë mbërritur të tjera pamje, të dërguara nga Arbër Habilaj, një prej personave të përfshirë në konflikt dhe aktualisht i shpallur në kërkim nga Policia.
Këtë herë, Habilaj ka dërguar disa fotografi që, sipas tij, tregojnë momentet para përleshjes së filmuar në videon e publikuar më herët nga “Piranjat News”.
Në fotot e dërguara në redaksi duket një person me plagë dhe gjak në pjesën e kokës. Sipas versionit të Habilajt, bëhet fjalë për vëllain e tij, i cili, sipas tij është goditur me gotë në kokë nga kamarieri 18-vjeçar, Genti Nela.
Sipas rrëfimit të Habilajt, kjo ka qenë pikënisja e konfliktit dhe më pas situata ka agravuar, duke çuar në përleshjen e filmuar në videon e siguruar nga “Piranjat News”.
Në pamjet e publikuara më herët shihet momenti kur 18-vjeçari përfshihet në përleshje me disa persona. Sipas Habilajt, pas incidentit me gotën, kanë ndërhyrë edhe persona të tjerë dhe konflikti është përshkallëzuar në dhunë fizike.
Habilaj pretendon se fotografitë e dërguara në redaksi janë prova të asaj që ka ndodhur përpara momentit të regjistruar në video dhe se versioni i tij ndryshon nga pretendimi se përplasja ka nisur për shkak të një page të papaguar.
Megjithatë, “Piranjat News” nuk mund të verifikojë në mënyrë të pavarur momentin kur janë realizuar fotografitë, rrethanat e dëmtimit apo identitetin e personave që shfaqen në to. Për këtë arsye, pretendimet e mësipërme paraqiten si versioni i Arbër Habilajt, i cili është një nga personat e përfshirë në ngjarje dhe aktualisht në kërkim nga Policia.
Për ngjarjen, Florian Habilaj dhe Enold Dragoti janë lënë në arrest në burg për 45 ditë dhe akuzohen për “Plagosje të rëndë me dashje”, ndërsa Arbër Habilaj është shpallur në kërkim.
Ndërkohë, vijojnë hetimet për të zbardhur të plotë dinamikën e konfliktit, përfshirë edhe momentet që kanë paraprirë përleshjen e filmuar.
Fotot e publikuara më poshtë janë siguruar dhe dërguar në redaksinë e “Piranjat News” nga Arbër Habilaj dhe publikohen në funksion të informimit të publikut./Piranjat News
