Ministria e Drejtësisë ka reaguar lidhur me transferimin e Erion Veliajt nga ambientet e paraburgimit, duke sqaruar se lëvizja drejt Institucioni...
AKTUALITET
Eksperti ngre alarmin: 10 mijë hektarë të djegura, institucionet fokusohen te shuarja, jo te parandalimi
PiranjatPërditësimi i fundit 31 August 2026, 08:04
Zjarret vijojnë të përbëjnë një problem serioz për territorin shqiptar, ndërsa deri tani janë regjistruar rreth 10,828 hektarë sipërfaqe pyjore të djegura.
Inxhinieri i pyjeve Elvin Toromani paralajmëron se situata nuk mund të konsiderohet e qetë, pasi vatrat vijojnë të jenë aktive dhe muaji gusht ka shënuar një rritje të ndjeshme të rasteve.
I ftuar në ABC News, Toromani tha se veçanërisht pas datës 16 gusht është konstatuar një shtim i konsiderueshëm i zjarreve, të cilat janë shtrirë në zona të ndryshme të vendit.
“Deri në këto momente për Shqipërinë raportohet një sipërfaqe e djegur nga zjarret në vlerën e 10,828 hektarë, e cila po t’i referohemi dy viteve të fundit është më e ulët, por duhet të kemi parasysh që ne ende jemi duke u përballur me zjarret”, tha ai.
Eksperti e cilësoi veçanërisht shqetësuese faktin që flakët kanë prekur edhe zona të mbrojtura, duke rrezikuar ekosisteme dhe habitate me rëndësi.
Por për Toromanin, problemi nuk qëndron vetëm te përmasat e zjarreve. Ai kritikoi qasjen institucionale, duke argumentuar se strukturat përgjegjëse fokusohen kryesisht te ndërhyrja pasi zjarri ka nisur, ndërsa parandalimi mbetet në plan të dytë.
“E vetmja gjë që bëhet është që i kushtohet vëmendje pjesës së ndërhyrjes së zjarrit, por jo asaj që është më e rëndësishme, parandalimit”, u shpreh inxhinieri i pyjeve.
Përveç humbjes së masës pyjore, zjarret dëmtojnë habitatet dhe faunën e egër, varfërojnë tokën dhe ndikojnë në burimet ujore.
“Kemi dëmtime të habitateve dhe të faunës së egër, dëmtime të cilësisë së tokës, të varfërimit të saj. Kemi gjithashtu pasoja në burimet ujore dhe në cilësinë e ujërave. Dëmet janë jashtëzakonisht të mëdha”, deklaroi Toromani.
