Kreu i PD Sali Berisha është kthyer në Tiranë pas vizitës në SHBA, ku në një prononcim të shkurtër nga Rinasi ...
AKTUALITET
Emaili për drejtorin Hitaj zbulon qendrën e lojërave të fatit në Kavajë, dy të rinjtë ikin
PiranjatPërditësimi i fundit 26 Prill 2026, 10:50
Policia e Shtetit ka vijuar operacionin “Fati i Lojërave”, duke zbuluar dy ambiente të përshtatura për lojëra fati në Kavajë pas një emaili të mbërritur në zyrën e kreut të Policisë, Skënder Hitaj.
Aksioni u zhvillua pas informacioneve të siguruara nga Drejtoria e Përgjithshme e Policisë. Gjatë kontrollit në dy ambiente, në lagjen nr. 6 dhe lagjen nr. 1, u sekuestruan 16 makineta që përdoreshin për aktivitete të paligjshme.
Në kërkim janë shpallur dy persona, një 26-vjeçar, në ambientin e të cilit u gjetën 5 makineta, dhe një 20-vjeçar, ku u sekuestruan 11 të tjera.
Materialet i janë referuar Prokurorisë së Durrësit, ndërsa vijon puna për kapjen e të shpallurve në kërkim.
Njoftimi:
Pas informacioneve të mbërritura në Drejtorinë e Përgjithshme të Policisë së Shtetit dhe finalizimit të operacioneve në Kurbin, Milot e Tiranë për përshtatje të ambienteve për zhvillimin e lojërave të fatit me makineta, një tjetër informacion ka ardhur në Drejtorinë e Përgjithshme të Policisë për dy ambiente në dy lagje të qytetit të Kavajës, që ishin përshtatur për lojëra fati.
Bazuar në këtë informacion, shërbimet e Policisë organizuan dhe finalizuan operacionin e koduar “Fati i Lojërave”.
Gjatë operacionit u zbuluan 2 ambiente në lagjen nr. 6 dhe lagjen nr. 1, në Kavajë, të përshtatura për organizim të kundërligjshëm të lojërave të fatit.
Në vijim të veprimeve procedurale u shpallën në kërkim shtetasit:
K. C., 26 vjeç, pasi në lagjen nr. 6, Kavajë, në një ambient të marrë me qira prej tij, u gjetën dhe u sekuestruan 5 makina për lojëra fati;
K. Ç., 20 vjeç, pasi në lagjen nr. 1, Kavajë, në një ambient të marrë me qira prej tij, u gjetën dhe u sekuestruan 11 makina për lojëra fati.
Po punohet për kapjen e dy shtetasve të shpallur në kërkim.
Materialet procedurale i janë referuar Prokurorisë pranë Gjykatës së Juridiksionit të Përgjithshëm Durrës, për veprime të mëtejshme.
Policia e Shtetit falënderon qytetarët për bashkëpunimin dhe i fton ata që të denoncojnë çdo rast paligjshmërie, duke u garantuar anonimat të plotë, reagim të shpejtë dhe profesional.
